ریاض:پاکستان کے چیئرمین جوائنٹ چیفس آف سٹاف کمیٹی، جنرل ساحر شمشاد مرزا نے سعودی عرب کے سرکاری دورے کے دوران جوائنٹ ملٹری آپریشن کمیٹی کے آٹھویں اجلاس میں شرکت کی۔ ان کے دورے میں نائب وزیر دفاع میجر جنرل طلال بن عبداللہ العتیبی اور سعودی چیف آف جنرل اسٹاف جنرل فیاض بن حمید الرویلی سے اہم ملاقاتیں بھی ہوئیں۔
آئی ایس پی آر کے مطابق، ملاقاتوں کے دوران، دونوں رہنماؤں نے دفاعی امور، علاقائی سیکیورٹی کی صورتحال اور دوطرفہ فوجی تعلقات پر بات چیت کی۔ جنرل ساحر شمشاد مرزا اور جنرل فیاض بن حمید الرویلی نے فوجی تعاون کمیٹی کے اجلاس کی مشترکہ صدارت کی، جس میں دونوں ممالک کے درمیان فوجی تبادلہ، تربیتی پروگرام اور دفاعی تعاون کے دیگر پہلوؤں پر تبادلہ خیال کیا گیا۔
اجلاس کے دوران سعودی عسکری قیادت نے پاکستان کی مسلح افواج کی پیشہ ورانہ مہارت کو سراہا اور دہشت گردی کے خلاف جنگ میں پاکستان کی قربانیوں کا اعتراف کیا۔ اس موقع پر، مسلح افواج کے ہیڈکوارٹر پہنچنے پر جنرل ساحر شمشاد مرزا کو گارڈ آف آنر پیش کیا گیا۔