لاہور: انسٹی ٹیوٹ فار پبلک اوپینین ریسرچ نے پنجاب حکومت کی کارکردگی پر عوامی سروے کی رپورٹ جاری کردی، جس میں صوبے کے 36 اضلاع سے 6 ہزار سے زائد شہریوں کی رائے شامل کی گئی۔
سروے کے مطابق پنجاب حکومت کی کارکردگی سے 62 فیصد شہری مطمئن نظر آئے، جبکہ تعلیم، صحت، انفرا اسٹرکچر اور امن عامہ کے حوالے سے صوبائی حکومت کے اقدامات کو سراہا گیا۔
سروے میں 57 فیصد افراد نے گزشتہ سال کے مقابلے میں حکومتی گورننس میں بہتری دیکھی، جبکہ 17 فیصد نے اسے مزید خراب قرار دیا، اور 24 فیصد نے کوئی خاص فرق محسوس نہیں کیا۔
وزیر اعلیٰ پنجاب مریم نواز کی کارکردگی سے 59 فیصد شہری خوش دکھائی دیے، 16 فیصد نے عدم اطمینان کا اظہار کیا، جبکہ 24 فیصد نے اسے قابل قبول قرار دیا۔
عوامی رائے کے مطابق، 57 فیصد افراد نے مریم نواز کو صوبے کے اہم مسائل اور گورننس چیلنجز سے نمٹنے میں کامیاب قرار دیا، تاہم 36 فیصد شہریوں نے انہیں اس میں ناکام سمجھا۔