واشنگٹن: وزیر خزانہ محمد اورنگزیب کی عالمی مالیاتی اداروں کے سربراہان سے ملاقاتیں، معاشی اصلاحات پر بھرپور اعتماد کا اظہار

واشنگٹن وفاقی وزیر خزانہ و محصولات محمد اورنگزیب نے واشنگٹن میں آئی ایم ایف اور ورلڈ بینک کے سالانہ اجلاسوں کے موقع پر عالمی مالیاتی اداروں کے سربراہان اور بین الاقوامی رہنماؤں سے اہم ملاقاتیں کیں، جن میں پاکستان کی معاشی سمت اور اصلاحاتی ایجنڈے کو سراہا گیا ہے۔
وزیر خزانہ محمد اورنگزیب نے بین الاقوامی مالیاتی فنڈ (IMF) کی مینیجنگ ڈائریکٹر کرسٹالینا جارجیوا سے ملاقات کی۔ اس موقع پر آئی ایم ایف سربراہ نے پاکستان کی جانب سے معاشی استحکام کے لیے اٹھائے گئے اقدامات اور مشکل اصلاحات پر عملدرآمد کی تعریف کی۔ انہوں نے اس عزم کا اظہار کیا کہ آئی ایم ایف پاکستان کی پائیدار ترقی اور معاشی استحکام کے اہداف کے حصول میں اپنا تعاون جاری رکھے گا۔
وزیر خزانہ نے اقوام متحدہ کے سیکرٹری جنرل انتونیو گوتریس سے بھی ملاقات کی۔ ملاقات کے دوران عالمی سیاسی صورتحال، بالخصوص مشرق وسطیٰ کے تنازعات اور ان کے عالمی معیشت پر اثرات پر تبادلہ خیال کیا گیا۔ سیکرٹری جنرل نے پاکستان کی معاشی بحالی کی کوششوں اور عالمی فورمز پر پاکستان کے مثبت کردار کو سراہا۔
ایشیائی ترقیاتی بینک کے صدر ماساتو کاندا سے ملاقات کے دوران پاکستان میں جاری ترقیاتی منصوبوں اور مستقبل کی سرمایہ کاری پر بات چیت ہوئی۔ اے ڈی بی کے صدر نے پاکستان میں ٹیکس نظام کی ڈیجیٹلائزیشن اور ریونیو بڑھانے کی کوششوں میں بینک کے مکمل تعاون کا یقین دلایا۔
ان ملاقاتوں کے دوران وزیر خزانہ نے درج ذیل اہم نکات پر زور دیا۔پاکستان بین الاقوامی سرمایہ کاروں کے اعتماد کی بحالی کے لیے شفاف پالیسیاں اپنا رہا ہے۔اقوام متحدہ کے تحت 'بوروورز پلیٹ فارم' کے ذریعے قرضوں کے بوجھ کو کم کرنے کے لیے مشترکہ عالمی حکمت عملی پر بات چیت۔    ٹیکس اصلاحات: ملک میں ٹیکس نیٹ بڑھانے اور معیشت کو دستاویزی شکل دینے کے لیے ڈیجیٹلائزیشن کا عمل تیز کرنا۔