اسلام آباد: وفاقی وزیر اطلاعات و نشریات عطا تارڑ نے کہا ہے کہ پاکستان تحریک انصاف (پی ٹی آئی) کے چیئرمین عمران خان ڈیل کرنے کی کوشش کر رہے ہیں، لیکن کرپشن کے معاملے میں کوئی رعایت نہیں دی جائے گی۔ انہوں نے 190 ملین پاؤنڈ کے کرپشن اسکینڈل کو ملکی تاریخ کا سب سے بڑا اسکینڈل قرار دیا۔
اسلام آباد میں پریس کانفرنس کے دوران عطا تارڑ نے کہا کہ آزاد مبصرین بھی اس کرپشن اسکینڈل میں کسی کو بری الذمہ قرار نہیں دے رہے، اور یہ اسکینڈل ملک کی تاریخ کا سب سے بڑا کرپشن اسکینڈل ہے۔
عطا تارڑ نے مزید کہا کہ ملکی معیشت درست سمت میں گامزن ہے، اور مہنگائی میں کمی آئی ہے۔ ورلڈ اکنامک فورم کی رپورٹ کے مطابق پاکستان کی معیشت پر عالمی اعتماد میں اضافہ ہوا ہے اور ڈیفالٹ کا خطرہ مکمل طور پر ختم ہوگیا ہے۔
وزیر اطلاعات نے کہا کہ برطانیہ کی نیشنل کرائم ایجنسی (این سی اے) نے وزیراعظم شہباز شریف کو بے گناہ قرار دیا تھا، اور اسی ایجنسی نے 190 ملین پاؤنڈ ضبط کر کے پاکستان بھیجے۔ اگر یہ رقم غیر قانونی ہوتی تو برطانیہ نے اسے پاکستان کے حوالے کیوں کیا؟
انہوں نے پی ٹی آئی سے سوال کیا کہ اگر یہ رقم عوامی یا سرکاری خزانے کا نہیں تھی تو برطانیہ نے اسے حکومت پاکستان کے حوالے کیوں کیا؟
عطا تارڑ نے عمران خان سے سوال کیا کہ اگر ان کے پاس کوئی ذریعہ آمدن نہیں تھا تو زمان پارک میں 25 کروڑ روپے کا نیا گھر کیسے بنایا گیا؟
انہوں نے کہا کہ اپنے سیاسی کیریئر میں کبھی کابینہ میں بند لفافہ نہیں دیکھا اور کابینہ میں جو ایجنڈا آتا ہے اس پر کھل کر بحث کی جاتی ہے۔ انہوں نے مزید کہا کہ رشوت کے ذریعے ہیرے اور جواہرات خریدے گئے، اور قوم کے اربوں روپے لوٹنے والوں کو جوابدہ ہونا ہوگا۔
عطا تارڑ نے کہا کہ مذاکرات اچھے طریقے سے آگے بڑھ رہے ہیں، لیکن کرپشن کے معاملے میں کوئی رعایت نہیں ملے گی۔ عمران خان ڈیل کرنا چاہتے ہیں اور اپنے لوگوں کو جیل سے باہر نکالنے کی کوشش کر رہے ہیں۔ انہوں نے مرزا شہزاد اکبر کو پاکستان واپس آنے کی دعوت دی، تاہم کہا کہ وہ اپنے کیسز کا سامنا کرنے کا حوصلہ نہیں رکھتے