صنعا : امریکا نے یمن کے دارالحکومت صنعا پر فضائی حملے کیے ہیں جس کے نتیجے میں کم از کم 24 افراد ہلاک اور متعدد زخمی ہوگئے ہیں۔ عرب میڈیا کے مطابق یہ حملے یمن میں حوثی باغیوں کے خلاف کیے گئے ہیں۔
امریکی صدر ڈونلڈ ٹرمپ نے سوشل میڈیا پر ایک پوسٹ میں کہا کہ انہوں نے امریکی فوج کو حکم دیا ہے کہ وہ یمن کے حوثی دہشت گردوں کے خلاف فیصلہ کن اور طاقتور فوجی آپریشن شروع کردے۔صدر ٹرمپ نے کہا، "تمہارا وقت ختم ہوگیا ہے، اور آج سے تمہارے حملے بند ہونے چاہئیں ورنہ تمہارے ساتھ وہ ہوگا جو پہلے کبھی نہیں ہوا ۔"
یاد رہے کہ حوثی باغی فلسطین کی حمایت میں یمن کے ساحل کے قریب سے گزرنے والے اسرائیلی بحری جہازوں کو نشانہ بناتے رہے ہیں۔ اس کے علاوہ، غزہ جنگ کے دوران حوثیوں نے اسرائیل پر براہ راست میزائل حملے بھی کیے تھے۔