کراچی: دھابیجی پمپنگ سٹیشن کے سیکنڈ فیز میں دوبارہ بڑا بریک ڈاؤن رپورٹ ہوا ہے جس کے باعث شہر کو تقریباً 100 ملین گیلن پانی کی کمی کا سامنا ہو سکتا ہے۔ واٹر کارپوریشن کے ترجمان کے مطابق بریک ڈاؤن آج صبح 6 بج کر 35 منٹ پر ہوا، جس کے نتیجے میں سٹیشن کے دوسرے فیز کے دو پمپ بند ہوگئے اور لائن نمبر 5 متاثر ہوئی۔
ترجمان کا کہنا تھا کہ متاثرہ لائن کی مرمت فوری طور پر شروع کر دی گئی ہے اور انتظامیہ مرمتی کام کو بروقت مکمل کرنے کی بھرپور کوششیں کر رہی ہے تاکہ پانی کی فراہمی جلد معمول پر آ سکے۔ ان کا مزید کہنا تھا کہ مرمت مکمل ہونے کے بعد سٹیشن کا نظام دوبارہ مکمل طور پر فعال ہو جائے گا۔
یہ بریک ڈاؤن اس سے قبل 5 نومبر کو ہونے والے حادثے سے ملتا جلتا ہے، جب کے تھری پمپ ہاؤس میں کیبل فالٹ کے باعث 36 گھنٹے تک پانی کی فراہمی معطل رہی تھی، جس سے کراچی کے مختلف علاقوں میں شدید پانی کی قلت پیدا ہوئی تھی۔
کراچی کے پانی کے مسائل اس وقت شدت اختیار کر چکے ہیں، اور اس طرح کے بریک ڈاؤن شہر کی بڑھتی ہوئی آبادی کے لیے مزید مشکلات کا سبب بن رہے ہیں۔ واٹر کارپوریشن نے اس صورتحال پر قابو پانے کے لیے اقدامات کیے ہیں، لیکن شہریوں کا کہنا ہے کہ اس مسئلے کا مستقل حل نکالنا وقت کی ضرورت ہے۔