پرتگال: پرتگال کے عالمی شہرت یافتہ فٹبالر کرسٹیانو رونالڈو نے اپنے شاندار کھیل کے سفر کے اختتام سے متعلق اہم اشارہ دے دیا ہے۔ 41 سالہ سٹار کھلاڑی کے مطابق موجودہ سیزن ممکنہ طور پر ان کے پروفیشنل فٹبال کیریئر کا آخری مرحلہ ثابت ہوسکتا ہے۔
ایک حالیہ انٹرویو میں رونالڈو نے کہا کہ وہ فٹبال سے رخصت ہوتے وقت اپنے پیچھے ایک ایسا ورثہ چھوڑنا چاہتے ہیں جسے طویل عرصے تک یاد رکھا جائے۔ تاہم انہوں نے اپنے ریٹائرمنٹ کے لیے حتمی تاریخ کا اعلان نہیں کیا۔
پانچ مرتبہ بیلن ڈی اور کا اعزاز حاصل کرنے والے رونالڈو اپنے کیریئر میں انگلینڈ، سپین، اٹلی اور سعودی عرب میں لیگ ٹائٹلز جیت چکے ہیں۔ وہ بین الاقوامی فٹبال میں سب سے زیادہ گول کرنے والے کھلاڑی کا اعزاز بھی اپنے نام رکھتے ہیں۔
پرتگال کے کپتان گزشتہ تقریباً چار برس سے سعودی عرب کے کلب النصر کی نمائندگی کر رہے ہیں اور ان کے موجودہ معاہدے میں مزید ایک سال باقی ہے۔
رونالڈو نے مستقبل کے حوالے سے اپنی خواہشات کا اظہار کرتے ہوئے کہا کہ فٹبال سے ریٹائرمنٹ کے بعد وہ اپنے خاندان کے ساتھ زیادہ وقت گزارنا، سفر کرنا اور پیڈل سمیت دیگر سرگرمیوں سے لطف اندوز ہونا چاہتے ہیں۔
خیال رہے کہ رونالڈو نے حال ہی میں اپنی دیرینہ ساتھی جارجینا روڈریگز سے شادی کی ہے۔ دونوں کے پانچ بچے ہیں۔
دوسری جانب رونالڈو اپنے کیریئر میں 1000 گول مکمل کرنے کے سنگِ میل کے بھی قریب پہنچ چکے ہیں اور انہیں یہ اعزاز حاصل کرنے کے لیے مزید 24 گول درکار ہیں۔
ادھر ان کے طویل عرصے سے حریف تصور کیے جانے والے ارجنٹائن کے سٹار لیونل میسی بھی اپنے فٹبال مستقبل کے حوالے سے غیر یقینی کا اظہار کرچکے ہیں۔