لاہور: پاکستان کے مقبول یوٹیوبر ڈکی بھائی نے حالیہ فیملی وی لاگ میں ایک غیر متوقع اعتراف کرتے ہوئے اپنے مداحوں کو حیران کن طور پر اطلاع دی ہے۔ جیل سے رہائی کے بعد یوٹیوب پر واپسی کرنے والے ڈکی بھائی نے کہا کہ وہ وی لاگ کا آغاز (انٹرو) ریکارڈ کرتے ہوئے شدید مشکلات کا سامنا کر رہے تھے، حالانکہ یہ وہ ہی چیز تھی جو ہمیشہ ان کی پہچان بن چکی تھی۔
ڈکی بھائی، جو جلد 10 ملین سبسکرائبرز کا سنگِ میل عبور کرنے والے ہیں، حال ہی میں اس وقت خبروں میں آئے تھے جب انہیں جوا ایپس کی تشہیر کے الزام میں تین ماہ کے لیے جیل بھیج دیا گیا تھا۔ نومبر کے آخر میں ضمانت پر رہائی کے بعد انہوں نے ایک تفصیلی وی لاگ میں دوران حراست ہونے والی ناانصافیوں کا ذکر کیا تھا۔
رہائی کے بعد پوسٹ کیے گئے اپنے پہلے فیملی وی لاگ میں ڈکی بھائی نے بتایا کہ وہ تقریباً 30 منٹ تک انٹرو ریکارڈ کرنے کی کوشش کرتے رہے مگر بار بار ناکام ہوتے رہے۔ انہوں نے وی لاگ میں اپنی کئی ناکام کوششیں بھی دکھائیں اور کھل کر اعتراف کیا کہ اب ان کے وی لاگ میں وہ بچپنا اور بے ساختگی نہیں رہی جو کبھی ان کی پہچان تھی۔
اس دوران ان کی اہلیہ عروب نے بھی گفتگو میں حصہ لیا اور کہا کہ وہ چاہتی تھیں کہ ڈکی بھائی زیادہ سنجیدہ اور میچور ہوں، ساتھ ہی ساتھ وزن بھی کم کریں، اور یہ سب جیل کے تجربے کے بعد ممکن ہو سکا۔ ڈکی بھائی نے انکشاف کیا کہ جیل جانے سے قبل ان کا وزن 99 کلو تھا، جبکہ واپسی پر ان کا وزن کم ہو کر 81 کلو رہ گیا۔
ڈکی بھائی کی یوٹیوب پر واپسی نے مداحوں میں خوشی کی لہر دوڑا دی ہے۔ کمنٹس میں مختلف طبقات سے تعلق رکھنے والے فینز نے ان کے لیے نیک تمناؤں اور دعاؤں کا اظہار کیا۔ ایک مداح نے لکھا کہ "میں نے ڈکی بھائی کی واپسی کے لیے دعا کی تھی"، جبکہ ایک اور صارف نے کہا، "اللہ کا شکر ہے کہ وہ واپس آ گئے، ان کا انٹرو بہت یاد آ رہا تھا۔" کچھ مداحوں نے یہ بھی لکھا کہ پوسٹ کرنے کا انداز جیسا بھی ہو، بس ڈکی بھائی کی موجودگی ہی کافی ہے، جبکہ ایک صارف نے اعتراف کیا کہ "میں نے کبھی نہیں سوچا تھا کہ کسی یوٹیوبر کے لیے اتنا روؤں گا۔"