اسلام آباد: ایف آئی اے سائبر کرائم سرکل اسلام آباد نے بڑی کارروائی کرتے ہوئے ریاستی اداروں کے خلاف نفرت انگیز مہم چلانے والے حیدر سعید نامی ملزم کو گرفتار کر لیا۔ ایف آئی اے کے ترجمان کے مطابق، ملزم کو بنی گالا اسلام آباد میں چھاپہ مار کارروائی کے دوران گرفتار کیا گیا۔
گرفتار ملزم نے جعفر ایکسپریس سانحہ کے دوران اداروں کے خلاف منفی پروپیگنڈا اور تضحیک آمیز مواد سوشل میڈیا پر شیئر کیا۔ اس کے علاوہ، ملزم سوشل میڈیا پر کالعدم دہشت گرد تنظیموں کی حمایت اور تشہیر کرنے میں بھی ملوث پایا گیا تھا۔
ایف آئی اے کے مطابق، ملزم نہ صرف ریاستی اداروں کے خلاف زہر آلود مہم چلا رہا تھا بلکہ دہشت گردوں کے حق میں اشتعال انگیز بیانات اور مواد بھی شیئر کرتا رہا تھا۔ ایف آئی اے نے ملزم کے سوشل میڈیا اکاؤنٹس اور ڈیجیٹل شواہد قبضے میں لے کر تحقیقات کا آغاز کر دیا ہے۔ حکام کا کہنا ہے کہ ملزم کے خلاف قانون کے مطابق سخت کارروائی کی جائے گی۔