اسلام آباد:پاکستان میں شدید گرمی کی لہر نے اپنی شدت پکڑ لی ہے، اور محکمہ موسمیات کے مطابق یہ لہر مزید تین سے چار روز تک برقرار رہنے کا امکان ہے۔ اسلام آباد اور اس کے ارد گرد کے علاقوں میں شدید گرم اور خشک موسم کا سامنا رہے گا، جب کہ بالائی علاقوں میں 17 سے 19 مئی تک درجہ حرارت معمول سے سات ڈگری زائد رہنے کی پیش گوئی کی گئی ہے۔
محکمہ موسمیات نے کہا کہ جنوبی پاکستان میں 17 سے 20 مئی تک درجہ حرارت معمول سے چھ ڈگری تک زیادہ رہ سکتا ہے، خاص طور پر خیبر پختونخوا کے جنوبی اور وسطی اضلاع میں شدید گرمی اور خشک موسم کی شدت بڑھ جائے گی۔ پنجاب کے مختلف حصوں میں بھی دن کے اوقات میں درجہ حرارت میں اضافہ متوقع ہے۔
سندھ کے بیشتر علاقوں میں درجہ حرارت 47 سے 48 ڈگری سینٹی گریڈ تک پہنچنے کا خدشہ ہے، اور بلوچستان کے جنوبی اضلاع میں بھی شدید گرمی کے ساتھ تیز ہواؤں کا چلنا متوقع ہے۔ کشمیر اور گلگت بلتستان میں بھی موسم گرم اور خشک رہنے کی توقع ہے، جہاں درجہ حرارت معمول سے زیادہ رہ سکتا ہے۔
محکمہ موسمیات نے شہریوں کو گرمی سے بچاؤ کے لیے احتیاطی تدابیر اختیار کرنے کی ہدایت دیتے ہوئے کہا کہ وہ زیادہ پانی پیئیں، دھوپ میں کم وقت گزاریں، اور صحت کے مسائل سے بچنے کے لیے اپنے جسم کو ٹھنڈا رکھنے کی کوشش کریں۔