ڈھرکی:سندھ میں تیل اور گیس کے نئے ذخائر دریافت ہوئے ہیں، ماڑی انرجیز لمیٹڈ نے غزیج ایکسپلوریشن ویل سے یومیہ تیل و گیس کے حصول کی کامیاب آزمائش کے بعد دریافت کا باضابطہ اعلان کر دیا۔
کمپنی کے مطابق، ابتدائی ٹیسٹنگ کے دوران کنویں سے یومیہ 305 بیرل خام تیل اور 3 ایم ایم ایس سی ایف ڈی (ملین مکعب فٹ فی دن) گیس حاصل ہوئی ہے۔ یہ پیشرفت ملک میں توانائی کے بحران پر قابو پانے کی جانب ایک مثبت قدم تصور کی جا رہی ہے۔
ماڑی انرجیز کے منیجنگ ڈائریکٹر فہیم حیدر نے اس دریافت کو کمپنی کی ٹیم اور سائنسدانوں کی محنت کا نتیجہ قرار دیتے ہوئے کہا کہ ہمارا مقصد پاکستان میں کم ہوتی گیس پیداوار کو بحال اور مستحکم کرنا ہے۔
انہوں نے بتایا کہ ماڑی انرجیز لمیٹڈ ایک مکمل پیداواری و تلاشاتی (exploration & production) کمپنی ہے، جو سندھ کے شہر ڈھرکی میں واقع ماڑی فیلڈ کو کامیابی سے چلا رہی ہے — جو پاکستان کا سب سے بڑا گیس ذخیرہ ہے۔
فہیم حیدر نے مزید بتایا کہ ماڑی انرجیز اس وقت ملکی گیس مارکیٹ کا تقریباً 30 فیصد حصہ فراہم کر رہی ہے، اور قومی توانائی کے شعبے میں کلیدی کردار ادا کر رہی ہے۔