"پاکستان قدیم اور ہمہ جہت تہذیبوں کا امین"؛ وزیراعظم شہباز شریف کا عالمی یومِ ثقافتی ورثہ پر قوم کے نام خصوصی پیغام

اسلام آباد: وزیراعظم شہباز شریف نے کہا ہے کہ پاکستان کا ثقافتی ورثہ ایک عظیم اور ہمہ جہت تہذیب کا عکاس ہے، جو ہماری قومی شناخت اور اتحاد کی اصل روح ہے۔ عالمی یومِ ثقافتی ورثہ کے موقع پر اپنے پیغام میں انہوں نے واضح کیا کہ یہ ورثہ ماضی کی حفاظت، حال کی ترجمانی اور مستقبل کے لیے مستحکم بنیاد فراہم کرتا ہے۔
وزیراعظم نے اپنے پیغام میں عالمی سطح پر اس دن کی اہمیت کو اجاگر کرتے ہوئے کہا کہ  قدیم تہذیبوں کا مرکز: پاکستان کی سرزمین دنیا کی قدیم ترین تہذیبوں کی امین ہے، جو انسانی تخلیقی صلاحیتوں اور سماجی تنوع کی خوبصورت عکاسی کرتی ہے۔ہمارا ثقافتی ورثہ صرف چند عمارتیں نہیں بلکہ ہماری تاریخ ہے، جس کا تحفظ کرنا پوری قوم کی ذمہ داری ہے۔
شہباز شریف نے ملک کے نوجوانوں سے اپیل کی کہ وہ اپنے ثقافتی ورثے پر فخر کریں اور اس کے تحفظ و فروغ میں بڑھ چڑھ کر حصہ لیں۔ انہوں نے زور دیا کہ نوجوان نسل کو اپنے شاندار ماضی سے جڑنا چاہیے تاکہ وہ ایک باوقار مستقبل کی تعمیر کر سکیں۔وزیراعظم نے اپنے خطاب کے آخر میں کہا کہ ہمارا ورثہ ہمیں ایک لڑی میں پروتا ہے۔ انہوں نے تمام پاکستانیوں سے اپیل کی کہ وہ مل کر اس انمول قومی اثاثے کا جشن منائیں اور اسے آنے والی نسلوں کے لیے محفوظ بنانے کا عہد کریں۔