وزیراعظم شہباز شریف کا امیرِ قطر کو ٹیلی فون: رمضان المبارک کی مبارکباد اور دوطرفہ تعلقات مستحکم بنانے پر اتفاق

اسلام آباد: وزیراعظم پاکستان میاں محمد شہباز شریف نے قطر کے امیر شیخ تمیم بن حمد الثانی سے ٹیلی فونک رابطہ کیا ہے۔ اس دوران دونوں رہنماؤں نے ایک دوسرے کو رمضان المبارک کے مقدس مہینے کے آغاز پر دلی مبارکباد پیش کی۔ وزیراعظم شہباز شریف نے امیرِ قطر اور وہاں کی عوام کے لیے نیک خواہشات کا اظہار کیا، جبکہ امیرِ قطر نے بھی پاکستانی عوام کے لیے امن اور خوشحالی کی دعا کی۔
دونوں رہنماؤں نے پاکستان اور قطر کے درمیان موجود گہرے اور تاریخی برادرانہ تعلقات کو مزید وسعت دینے اور ہر شعبے میں تعاون بڑھانے کے عزم کا اعادہ کیا۔گفتگو کے دوران امتِ مسلمہ کے اتحاد اور خطے کی مجموعی صورتحال پر بھی تبادلہ خیال کیا گیا.
یاد رہے کہ قطر اور پاکستان کے درمیان توانائی، تجارت اور سرمایہ کاری کے شعبوں میں مضبوط شراکت داری موجود ہے، اور حالیہ رابطہ ان روابط کو مزید مستحکم کرنے کی ایک کڑی ہے۔