کیلیفورنیا:امریکی گلوکارہ ٹیلر سوئفٹ نے ایک اور شاندار کامیابی اپنے نام کرتے ہوئے انٹرنیشنل فیڈریشن آف دی فونوگرافک انڈسٹری (IFPI) کی جانب سے 2024 کے لیے گلوبل ریکارڈنگ آرٹسٹ آف دی ایئر کا اعزاز حاصل کیا ہے۔ یہ پانچواں موقع ہے جب سوئفٹ کو یہ اعزاز ملا، جو ان کے کیریئر کی ایک اور عظیم کامیابی ہے۔
ٹیلر سوئفٹ کی حالیہ البم "The Tortured Poets Department" نے عالمی سطح پر زبردست کامیابیاں حاصل کیں، اور گلوبل البم، گلوبل ونائل البم، گلوبل اسٹریمنگ البم اور گلوبل البم سیلز کے ٹاپ چارٹس میں سرفہرست رہی۔ اس البم کی 5.6 ملین کاپیاں فروخت ہوئیں، جس کے ساتھ یہ 2024 کے گلوبل البم سیلز چارٹ میں سب سے زیادہ فروخت ہونے والی البم بن گئی۔
"ایراس" ٹور نے بھی عالمی سطح پر کامیابی کے نئے ریکارڈ قائم کیے، جس نے ایک ارب ڈالرز سے زائد کی آمدنی حاصل کی اور اس کے پچھلے البمز کی مقبولیت میں بھی اضافہ کیا۔
IFPI کی چیف ایگزیکٹیو وکٹوریہ اوکلی نے اس کامیابی پر تبصرہ کرتے ہوئے کہا کہ یہ سال ٹیلر سوئفٹ کے لیے شاندار ثابت ہوا ہے، جنہوں نے اپنے غیر معمولی فن اور محنت سے عالمی سطح پر اپنی چھاپ چھوڑی۔
ٹیلر سوئفٹ کو یہ اعزاز پہلی بار 2014 میں دیا گیا تھا اور اس کے بعد 2019، 2022 اور 2023 میں بھی انہیں یہ ایوارڈ دیا گیا۔ یہ ایوارڈز کی 12 سالہ تاریخ میں کسی بھی فنکار کا سب سے زیادہ حاصل کیا جانے والا اعزاز ہے، جو سوئفٹ کی عالمی مقبولیت اور بے مثال کامیابی کی عکاسی کرتا ہے۔