ٹی ٹوئنٹی ورلڈ کپ: زمبابوے کا بڑا اپ سیٹ، سری لنکا کو ہرا کر ناقابلِ شکست رہتے ہوئے 'سپر ایٹ' میں قدم رکھ دیا

کولمبو:آئی سی سی ٹی ٹوئنٹی ورلڈ کپ 2026 میں افریقی ٹیم زمبابوے نے تاریخ رقم کر دی۔ بھارت، ویسٹ انڈیز اور نیوزی لینڈ جیسی بڑی ٹیموں کے نقشِ قدم پر چلتے ہوئے زمبابوے نے پہلے مرحلے میں ناقابلِ شکست رہنے کا اعزاز حاصل کر لیا اور میزبان سری لنکا کو عبرت ناک شکست دے کر سپر ایٹ مرحلے کے لیے کوالیفائی کر لیا۔
کولمبو میں کھیلے گئے گروپ بی کے اہم میچ میں زمبابوے نے سری لنکا کے خلاف ٹاس جیت کر پہلے باؤلنگ کا فیصلہ کیا۔ میزبان ٹیم نے مقررہ اوورز میں 7 وکٹوں کے نقصان پر 178 رنز بنائے۔ آسٹریلیا کے خلاف سنچری بنانے والے پاتھم نسانکا نے اس بار بھی عمدہ کھیل پیش کیا اور 66 رنز بنائے، جبکہ پاون رتنانائیکے 44 رنز کے ساتھ نمایاں رہے۔
 زمبابوے نے 179 رنز کا مشکل ہدف آخری اوور میں 4 وکٹوں کے نقصان پر حاصل کر لیا۔زمبابوے کی جیت میں بلے بازوں نے کلیدی کردار ادا کیا۔    برائن بینیٹ: 63 رنز کی ناقابلِ شکست اور فاتحانہ اننگز کھیلی۔    سکندر رضا (کپتان)، 45 رنز بنا کر ٹیم کی پوزیشن مستحکم کی۔    مارومانی، 34 رنز کی برق رفتار اننگز سے ہدف کو آسان بنایا۔
زمبابوے نے گروپ بی میں اپنی مہم کا اختتام 7 پوائنٹس کے ساتھ ٹاپ پوزیشن پر کیا۔ زمبابوے نے سری لنکا، آسٹریلیا اور عمان جیسی ٹیموں کو شکست دی۔ آئرلینڈ کے خلاف میچ بارش کی نذر ہوا، جس سے ٹیم کو ایک پوائنٹ ملا۔
 زمبابوے کی اس کارکردگی نے ثابت کر دیا ہے کہ وہ اب کسی بھی بڑی ٹیم کو اپ سیٹ کرنے کی بھرپور صلاحیت رکھتے ہیں۔ سپر ایٹ میں ان کی شمولیت سے ٹورنامنٹ مزید دلچسپ ہو گیا ہے۔