GTA- 6 کے حوالے سے سیاسی اور ڈیجیٹل دنیا میں نیا تنازع

06:14 PM, 19 Jun, 2026

تالاہاسی:راکی اسٹار گیمز نے وائٹ ہاؤس کی جانب سے Grand Theft Auto VI کے کور آرٹ سے ملتی جلتی ایک تصویر شیئر کیے جانے کے بعد مختصر اور غیر واضح ردعمل دے کر نئی بحث چھیڑ دی ہے۔

معاملہ اس وقت سامنے آیا جب وائٹ ہاؤس کے آفیشل سوشل میڈیا اکاؤنٹ نے GTA 6 کے کور آرٹ جیسی ایک تصویر پوسٹ کی، جو بظاہر مصنوعی ذہانت (AI) کے ذریعے تیار کی گئی تھی اور اس میں سابق امریکی صدر ڈونلڈ ٹرمپ سے مشابہت رکھنے والے مناظر بھی دکھائے گئے۔ اس پوسٹ کے بعد سوشل میڈیا پر اس حوالے سے شدید بحث شروع ہو گئی اور یہ معاملہ تیزی سے وائرل ہو گیا۔

گیمنگ ویب سائٹ کوٹاکو کے مطابق جب راکی اسٹار گیمز سے اس پوسٹ پر مؤقف لینے کی کوشش کی گئی تو کمپنی کے ترجمان نے صرف اتنا کہا: “No comment” (کوئی تبصرہ نہیں)۔

کمپنی کے اس مختصر جواب کو آن لائن صارفین مختلف انداز میں دیکھ رہے ہیں، جہاں کچھ اسے سیاسی معاملات سے دور رہنے کی پالیسی قرار دے رہے ہیں جبکہ کچھ کے مطابق یہ انٹلیکچوئل پراپرٹی کے غیر مجاز استعمال پر خاموش احتجاج ہو سکتا ہے۔

اس سے قبل بھی اسی نوعیت کے معاملات میں ویڈیو گیمز کے مواد کو سیاسی یا غیر متعلقہ پوسٹس میں استعمال کیا گیا تھا، تاہم گیم ڈویلپرز کی جانب سے براہِ راست ردعمل کم ہی سامنے آیا ہے۔

مزید برآں امریکی محکمہ صحت و انسانی خدمات کے سیکریٹری رابرٹ ایف کینیڈی جونیئر نے بھی راکی اسٹار کی GTA 6 پروموشنل ویڈیو کا ایک ایڈٹ شدہ ورژن شیئر کیا، جس کے ساتھ انہوں نے لکھا: “We flipped the food pyramid before we got GTA 6.”

راکی اسٹار گیمز، جو اپنی سخت اور منظم مارکیٹنگ حکمت عملی کے لیے مشہور ہے، اس وقت اپنی نئی گیم GTA VI کی بڑے پیمانے پر پروموشنل مہم کی تیاری کر رہا ہے۔ تاہم یہ واضح نہیں کہ کمپنی اس بڑھتے ہوئے سیاسی اور میڈیا ردعمل پر مزید کوئی بیان جاری کرے گی یا نہیں۔

Grand Theft Auto VI کی ریلیز 19 نومبر 2026 کو شیڈول ہے۔
مزیدخبریں