انقرہ: ترکیہ کی معروف فیشن انفلوئنسر عائشہ گل ایراسلان کی اچانک اور پراسرار موت نے سوشل میڈیا اور مداحوں کو گہرے صدمے میں مبتلا کر دیا ہے۔
27 سالہ عائشہ گل کو استنبول کے علاقے کاگیتھانے میں واقع ان کے رہائشی گھر سے بے ہوشی کی حالت میں پایا گیا۔ اہلِ خانہ کے مطابق جب ان سے رابطہ ممکن نہ ہو سکا تو تشویش بڑھ گئی، جس پر انہوں نے فوری طور پر متعلقہ حکام کو اطلاع دی۔
اطلاع ملتے ہی ریسکیو ٹیمیں موقع پر پہنچیں اور ابتدائی طبی معائنے کے بعد ان کی موت کی تصدیق کر دی گئی۔ بعد ازاں پولیس اور پراسیکیوٹر نے جائے وقوعہ کا تفصیلی معائنہ کیا جبکہ لاش کو مزید فرانزک تجزیے کے لیے منتقل کر دیا گیا تاکہ موت کی اصل وجہ معلوم کی جا سکے۔
ابتدائی اطلاعات کے مطابق عائشہ گل حال ہی میں بیرونِ ملک سفر سے واپس آئی تھیں، اس پہلو کو بھی تحقیقات میں شامل کیا جا رہا ہے۔
تحقیقات کے دوران عمارت کی سکیورٹی فوٹیج کا جائزہ لیا گیا، جس میں ایک شخص سونائے آدم کو ان کے گھر میں داخل ہوتے اور کچھ دیر بعد باہر نکلتے دیکھا گیا۔ پولیس نے مذکورہ شخص سے پوچھ گچھ کی تاہم بیان ریکارڈ کرنے کے بعد اسے رہا کر دیا گیا، جبکہ اس کے وکلا کا مؤقف ہے کہ وہ واقعے کے وقت موقع پر موجود نہیں تھا۔
حکام نے تاحال کسی بھی قسم کی بدفعلی کی تصدیق نہیں کی ہے، تاہم کیس کو مشکوک قرار دیتے ہوئے تحقیقات جاری رکھی گئی ہیں۔ حکام کے مطابق فرانزک رپورٹ سامنے آنے کے بعد ہی موت کی اصل وجہ واضح ہو سکے گی۔