مظفرآباد: آزاد جموں و کشمیر کی 20 رکنی نئی کابینہ نے ایوان صدر مظفرآباد میں حلف اٹھا لیا۔ سپیکر قانون ساز اسمبلی چودھری لطیف اکبر نے کابینہ کے ارکان سے حلف لیا۔ اس کابینہ میں 16 وزراء اور 4مشیر شامل ہیں، جبکہ وزیراعظم آزاد کشمیر فیصل ممتاز راٹھور بھی اس اہم تقریب میں شریک ہوئے۔
حلف اٹھانے والوں میں سردار فہیم ربانی، چودھری اخلاق، یاسر سلطان، سردار محمد حسین، نبیلہ ایوب، چودھری رشید، چودھری ارشد، جاوید بڈھانوی، جاوید ایوب، قاسم مجید، رفیق نیئر، دیوان چغتائی، ملک ظفر، ضیاء القمر، عامر یاسین، بازل نقوی، میاں عبد الوحید اور علی شان سونی شامل ہیں۔ ان سب نے وزیروں کے طور پر اپنے عہدے کا حلف اٹھایا۔ اس کے علاوہ، آزاد کشمیر حکومت کے دو مشیروں نے بھی اپنے عہدوں کا حلف اٹھایا، جس کا حلف وزیراعظم فیصل ممتاز راٹھور نے لیا۔
وزیراعظم فیصل ممتاز راٹھور نے اس موقع پر کہا کہ نئی کابینہ کی تشکیل سے حکومت کو مزید استحکام حاصل ہوگا اور آئندہ کے اقدامات کے لیے ایک مکمل ٹیم تیار ہو جائے گی۔
یہ حلف برداری تقریب اس لیے اہم تھی کہ کابینہ کی تشکیل میں مشاورتی مراحل مکمل نہ ہونے کی وجہ سے اسے گزشتہ روز مؤخر کر دیا گیا تھا۔ ابتدائی طور پر صرف 10 وزیروں کو کابینہ میں شامل کرنے کی تجویز تھی، لیکن اسمبلی کے اراکین نے اس تجویز کو مسترد کر دیا تھا۔ اس کے بعد پیپلز پارٹی کی رہنما فریال تالپور اور وزیراعظم فیصل ممتاز راٹھور کی قیادت میں مشاورت کا عمل جاری رہا، جس کے بعد وزیروں کی فہرست اور محکموں پر اتفاق رائے پیدا ہوا اور آج حلف برداری کا فیصلہ کیا گیا۔