پشاور: سپیکر خیبر پختونخوا اسمبلی بابر سلیم سواتی پر کرپشن اور اختیارات کے غلط استعمال سے متعلق الزامات کی تحقیقات مکمل ہو گئی ہیں۔ احتساب کمیٹی کے رکن قاضی انور ایڈووکیٹ کی جانب سے تیار کی گئی رپورٹ کے مطابق الزامات ثابت نہیں ہو سکے۔
7 صفحات پر مشتمل رپورٹ میں سپیکر بابر سلیم سواتی کو تمام الزامات سے بری قرار دیتے ہوئے کلین چٹ دی گئی ہے۔ رپورٹ میں کہا گیا ہے کہ سپیکر ہاؤس کی تزئین و آرائش پر خرچ ہونے والے 3 کروڑ روپے میں سپیکر کا کوئی کردار نہیں تھا، جبکہ آسٹریلیا میں ہونے والی کانفرنس میں ان کی شرکت کو ضروری قرار دیا گیا ہے۔
مزید بتایا گیا ہے کہ کلاس فور ملازمین کو قواعد کے مطابق متعلقہ دفتر کی سفارش پر بھرتی کیا گیا، جبکہ دیگر تمام تقرریاں اور ترقیاں بھی قانونی طریقۂ کار اور ڈی پی سی کی سفارشات کے تحت ہوئیں۔ احتساب کمیٹی نے واضح کیا ہے کہ سپیکر اسمبلی صرف ایوان کے سامنے جوابدہ ہوتے ہیں، کمیٹی کے سامنے نہیں۔
رپورٹ کے مطابق سینیٹر اعظم سواتی نے سپیکر بابر سلیم سواتی پر کرپشن اور غیر قانونی بھرتیوں کے الزامات عائد کیے تھے، جس کے بعد سپیکر نے خود معاملے کی انکوائری کے لیے پارٹی کمیٹی کو خط لکھا تھا۔ کمیٹی نے اعظم سواتی سے الزامات کے ثبوت مانگے تھے۔ ذرائع کے مطابق تحقیقاتی رپورٹ پاکستان تحریکِ انصاف کے سیکرٹری جنرل سلمان اکرم راجا کو ارسال کر دی گئی ہے۔