وزیر داخلہ محسن نقوی کی امریکی سفیر سے ملاقات: خطے کی صورتحال اور اسلام آباد مذاکرات پر اہم مشاورت

 اسلام آباد : وفاقی وزیر داخلہ محسن نقوی نے ڈپلومیٹک انکلیو میں امریکی سفارت خانے کا دورہ کیا، جہاں انہوں نے امریکی سفیر نیٹلی بیکر سے ملاقات کی۔ ملاقات میں پاک امریکہ تعلقات، علاقائی سلامتی اور باہمی دلچسپی کے امور پر تفصیلی تبادلہ خیال کیا گیا۔
 دونوں رہنماؤں نے مشرقِ وسطیٰ اور خطے کی تازہ ترین صورتحال پر مشاورت کی۔ امریکی سفیر نے خطے میں کشیدگی کم کرنے اور امن کے قیام کے لیے پاکستان کے مخلصانہ کردار کو سراہا۔
 وزیر داخلہ نے امریکی سفیر کو اسلام آباد مذاکرات کے دوسرے مرحلے کے لیے کیے گئے فول پروف سیکیورٹی انتظامات سے آگاہ کیا۔ انہوں نے بتایا کہ حکومت بین الاقوامی مذاکرات کے کامیاب اور محفوظ انعقاد کے لیے تمام وسائل بروئے کار لا رہی ہے۔
 ملاقات میں پاک امریکہ تعلقات کے فروغ اور مختلف شعبوں میں تعاون کو مزید وسعت دینے پر اتفاق کیا گیا۔سفارتی مبصرین کے مطابق، یہ ملاقات ایک ایسے وقت میں ہوئی ہے جب ایران اور امریکہ کے درمیان کشیدگی عروج پر ہے اور پاکستان ایک بار پھر خطے میں ثالث اور امن کار کے طور پر ابھر رہا ہے۔ وزیر داخلہ کی جانب سے سیکیورٹی بریفنگ اس بات کا ثبوت ہے کہ پاکستان بین الاقوامی سفارت کاری کے لیے ایک محفوظ اور مستحکم ماحول فراہم کرنے کے لیے پرعزم ہے۔