لاہور: پنجاب میں جنگلات کے تحفظ کے لیے فاریسٹ ترمیمی ایکٹ 2025 نافذ کر دیا گیا ہے جس کے تحت محکمہ جنگلات کو اضافی اختیارات دیے گئے ہیں۔ گورنر پنجاب نے اس ایکٹ کی توثیق کرتے ہوئے جنگلات کے تحفظ کے لیے انقلابی اقدامات اٹھائے ہیں، جس سے جنگلات کی حفاظت مزید مؤثر ہو گی۔
نئے ایکٹ کے تحت محکمہ جنگلات کو ایک باقاعدہ فورس کا درجہ دیا گیا ہے اور جنگلات کے تحفظ کے لیے اس کے اختیارات میں نمایاں اضافہ کیا گیا ہے۔ اس کے علاوہ، صوبے بھر میں فاریسٹ پروٹیکشن سنٹرز قائم کرنے کا فیصلہ کیا گیا ہے تاکہ جنگلات کے وسائل کی حفاظت کی جا سکے۔
ایس ڈی او، ڈی ایف او اور بلاک آفیسرز کی نئی درجہ بندی کی گئی ہے، تاکہ ان افسران کی کارکردگی میں بہتری آئے۔ ان افسران کو اب یہ اختیار حاصل ہوگا کہ وہ خود ایف آئی آر درج کریں، ملزمان کو گرفتار کر کے عدالت میں پیش کریں۔ اس کے ذریعے غیر قانونی کٹائی، تجاوزات اور ماحولیاتی جرائم کے خلاف تیز اور مؤثر کارروائی کی جائے گی۔
اس ایکٹ میں غیر قانونی کٹائی اور تجاوزات کی روک تھام کے لیے سخت جرمانے بھی متعارف کرائے گئے ہیں۔ اس کے ساتھ ہی ماحولیاتی جرائم کے مرتکب افراد کے خلاف بھی سخت قانونی کارروائی کی جائے گی۔
گورنر پنجاب نے اس قانون پر فوری عملدرآمد کے احکامات جاری کر دیے ہیں اور متعلقہ حکام کو اس عمل میں تیزی لانے کی ہدایت کی ہے تاکہ جنگلات کے قدرتی وسائل کا تحفظ یقینی بنایا جا سکے۔