اسلام آباد ؛ روس نے پاکستان، بھارت اور افغانستان کے درمیان بڑھتی ہوئی کشیدگی کو کم کرنے کے لیے ثالثی کا کردار ادا کرنے کی پیشکش کی ہے۔ روسی سفیر البرٹ خوریف نے اسلام آباد انسٹیٹیوٹ آف سٹریٹیجک سٹڈیز میں خطاب کرتے ہوئے کہا کہ خطے میں پائیدار امن کے قیام کے لیے روس ہر ممکن تعاون فراہم کرنے کے لیے تیار ہے۔
خوریف نے اپنی بات چیت میں جنوبی ایشیا میں جاری تناؤ اور افغانستان کی صورتحال کو روس کے لیے اہم اور حساس معاملہ قرار دیا۔ انہوں نے اس بات پر زور دیا کہ پاکستان کے دونوں ہمسایہ ممالک، بھارت اور افغانستان کے ساتھ تعلقات میں تناؤ کو کم کرنے کے لیے روس اپنی سفارتی کوششیں جاری رکھے گا۔
روس کے سفیر نے مزید کہا کہ جنوبی ایشیا میں بیرونی طاقتوں کی مداخلت نے کشیدگی کو بڑھا دیا ہے اور اس کے نتیجے میں خطے میں امن و استحکام کو خطرات لاحق ہیں۔ تاہم، انہوں نے واضح کیا کہ ہمسایہ ممالک اپنے تنازعات کو بہتر طور پر حل کر سکتے ہیں، اور روس ان کوششوں کی حمایت کرتا ہے۔
خوریف نے پاکستان کو ایک اہم شراکت دار قرار دیتے ہوئے کہا کہ پاکستان کی جغرافیائی اور سفارتی حیثیت خطے میں اہمیت رکھتی ہے، اور روس پاکستان کے ساتھ اقتصادی اور سماجی ترقی کے لیے تعاون کو مزید مستحکم کرنے کا خواہاں ہے۔
یہ بیان اس وقت سامنے آیا ہے جب پاکستان کے نائب وزیراعظم اسحاق ڈار نے ماسکو میں روس کے صدر ولادیمیر پوٹن سے ملاقات کی ہے، جس کے بعد دونوں ممالک کے تعلقات میں مزید گرمجوشی کی توقع کی جا رہی ہے۔ اس ملاقات کے بعد روس اور پاکستان کے درمیان تعاون میں مزید اضافہ ہونے کی امید کی جا رہی ہے، خاص طور پر خطے میں امن کے قیام کے حوالے سے۔