اسلام آباد : پاکستان اور متحدہ عرب امارات کے درمیان مفاہمت کی مختلف یادداشتوں پر دستخط کی تقریب آج اسلام آباد میں منعقد ہوئی۔ نائب وزیراعظم اسحاق ڈار اور یو اے ای کے نائب وزیراعظم و وزیر خارجہ شیخ عبداللہ بن زاید النہیان نے اس تقریب میں شرکت کی اور اہم مفاہمتی یادداشتوں پر دستخط کئے۔
یادداشتوں کے تحت دونوں ممالک کے درمیان ثقافتی تعاون، قونصلر امور کے حوالے سے مشترکہ کمیٹی کے قیام اور کاروباری تعلقات کے فروغ کے لیے اقدامات کیے جائیں گے۔ اس موقع پر قومی ورثہ ثقافت ڈویژن اور یو اے ای کی وزارت ثقافت کے درمیان ثقافتی تعاون کے حوالے سے ایک یادداشت پر دستخط ہوئے۔ اسی طرح، خارجہ وزارتوں کے درمیان قونصلر امور کی مشترکہ کمیٹی کے قیام پر بھی ایک یادداشت پر دستخط کئے گئے۔
اس کے علاوہ، یو اے ای پاکستان مشترکہ بزنس کونسل کے قیام کے لیے بھی تعاون کی یادداشت پر دستخط کیے گئے، جو فیڈریشن آف پاکستان چیمبر آف کامرس اور یو اے ای ایوان صنعت و تجارت کے درمیان طے پایا۔
قبل ازیں، یو اے ای کے نائب وزیراعظم شیخ عبداللہ بن زاید النہیان دفتر خارجہ پہنچے، جہاں نائب وزیراعظم اسحاق ڈار نے مرکزی دروازے پر معزز مہمان کا استقبال کیا۔ دونوں رہنماؤں نے ایک دوسرے سے گرمجوشی سے مصافحہ کیا اور اسحاق ڈار نے یو اے ای کے وزیر خارجہ سے اپنے وفد کا تعارف کرایا۔
استقبالیہ تقریب میں اسحاق ڈار نے کہا کہ "ہم اپنے معزز مہمان کو پاکستان میں خوش آمدید کہتے ہیں، اور یہ امید کرتے ہیں کہ آپ کا دورہ دونوں ممالک کے تعلقات کو مزید مستحکم کرے گا۔" انہوں نے کہا کہ پاکستان اور یو اے ای کے درمیان برادرانہ تعلقات ہیں اور دونوں ممالک بہت سے منصوبوں پر مشترکہ طور پر کام کر رہے ہیں۔
یو اے ای کے نائب وزیراعظم شیخ عبداللہ بن زاید النہیان نے پاکستان کے گرمجوشی سے استقبال پر اسحاق ڈار کا شکریہ ادا کرتے ہوئے کہا کہ "ہم پاکستان کے ساتھ اپنے تعلقات کو مزید مستحکم کرنے کے لیے کام کریں گے، اور پاکستان کے لوگ یو اے ای کی ترقی میں اہم کردار ادا کر رہے ہیں۔" انہوں نے کہا کہ اس دورے میں تجارت، سرمایہ کاری اور دیگر مختلف امور پر بات چیت کی جائے گی۔
یاد رہے کہ یو اے ای کے نائب وزیراعظم شیخ عبداللہ بن زاید النہیان اس وقت پاکستان کے دو روزہ سرکاری دورے پر موجود ہیں۔