اسلام آباد :خیبر پختونخوا میں سکولوں کی حالت زار سے متعلق ازخود نوٹس کیس میں سپریم کورٹ کے جسٹس جمال خان مندوخیل نے سیکرٹری تعلیم کی عدم حاضری پر شدید برہمی کا اظہار کیا۔ عدالت عظمیٰ نے سیکرٹری تعلیم خیبر پختونخوا کو آج دوپہر 12 بجے عدالت میں طلب کر لیا۔
جسٹس جمال خان مندوخیل نے سخت ریمارکس دیے کہ "سیکرٹری تعلیم نہیں ہیں، آپ لوگوں نے مذاق بنا رکھا ہے۔ ہماری عدالت کے گزشتہ احکامات کو دیکھیں، آپ اس عدالت کے احکامات کو نہیں مان رہے۔ ایک سیکرٹری اس عدالت کی بات نہیں سن رہا، یہ مذاق بنایا ہوا ہے۔"
انہوں نے ایڈووکیٹ جزل سے بات کرتے ہوئے کہا کہ "پشاور سے سیکرٹری دو گھنٹے میں آ سکتے ہیں، انہیں فوراً بلائیں، ہمیں ان کو بلانے کا طریقہ آتا ہے۔" عدالت نے کیس کی سماعت 12 بجے تک ملتوی کر دی، اور اس دوران صوبائی سیکرٹری خزانہ اور سیکرٹری مواصلات کو بھی 12 بجے تک عدالت میں طلب کر لیا۔