کیلیفورنیا: واٹس ایپ استعمال کرنے والے اکثر یہ جاننے کی کوشش کرتے ہیں کہ آیا کسی نے انہیں بلاک کر دیا ہے یا نہیں، لیکن اس حوالے سے یقین کے ساتھ کچھ کہنا ہمیشہ آسان نہیں ہوتا۔
عام طور پر اگر کسی رابطے کو بھیجے گئے پیغامات پر صرف ایک گرے چیک مارک ظاہر ہو، پروفائل تصویر نظر نہ آئے اور آخری بار آن لائن آنے کی معلومات بھی غائب ہوں تو صارف کو شک ہوتا ہے کہ شاید اسے بلاک کر دیا گیا ہے۔ تاہم یہ علامات پرائیویسی سیٹنگز کی وجہ سے بھی سامنے آ سکتی ہیں۔
ٹیکنالوجی سے متعلق ویب سائٹ WABetaInfo کی ایک رپورٹ میں دعویٰ کیا گیا ہے کہ واٹس ایپ کا ایک سکیورٹی فیچر ممکنہ طور پر بلاک ہونے کی نشاندہی کرنے میں مدد دے سکتا ہے۔
رپورٹ کے مطابق واٹس ایپ میں موجود آٹومیٹک انکرپشن ویریفکیشن سسٹم کو اس مقصد کے لیے استعمال کیا جا سکتا ہے۔ یہ فیچر بنیادی طور پر اس بات کی تصدیق کے لیے بنایا گیا ہے کہ چیٹ اینڈ ٹو اینڈ انکرپشن کے ذریعے محفوظ ہے۔
اس فیچر تک رسائی کے لیے صارف کو متعلقہ چیٹ کھول کر اوپر موجود رابطے کے نام پر کلک کرنا ہوگا اور پھر "Encryption" کا آپشن منتخب کرنا ہوگا۔ اس کے بعد واٹس ایپ خودکار طور پر گفتگو کے انکرپشن تحفظ کی جانچ کرتا ہے۔
رپورٹ میں بتایا گیا ہے کہ اگر سب کچھ معمول کے مطابق ہو تو ویریفکیشن کا عمل بغیر کسی رکاوٹ کے مکمل ہو جاتا ہے۔ تاہم اگر واٹس ایپ تصدیق مکمل نہ کر سکے اور متبادل طریقے اختیار کرنے کا مشورہ دے تو یہ اس بات کا اشارہ ہو سکتا ہے کہ صارف کو بلاک کیا گیا ہے۔
دلچسپ بات یہ ہے کہ اس عمل کے دوران دوسرے صارف کو کسی قسم کی اطلاع موصول نہیں ہوتی، جس کے باعث یہ جانچ خاموشی سے کی جا سکتی ہے۔
تاہم واٹس ایپ نے باضابطہ طور پر اس فیچر کو بلاک ہونے کی تصدیق کا ذریعہ قرار نہیں دیا۔ رپورٹ کے مطابق اسے حتمی ثبوت کے بجائے ایک مضبوط اشارہ سمجھا جانا چاہیے، کیونکہ بلاک ہونے کی تصدیق کے لیے دیگر عوامل کو بھی مدنظر رکھنا ضروری ہے۔