راولپنڈی :راولپنڈی میں جاری ٹیسٹ میچ کے تیسرے روز کھیل کے اختتام پر پاکستان نے دوسری اننگز میں 4 وکٹوں کے نقصان پر 94 رنز بنا کر جنوبی افریقہ پر 23 رنز کی برتری حاصل کر لی ہے۔ بابر اعظم 49 اور محمد رضوان 23 رنز کے ساتھ کریز پر موجود ہیں۔
پاکستان کی پہلی اننگز میں آصف آفریدی نے شاندار ڈیبیو کرتے ہوئے 5 وکٹیں حاصل کیں، وہ ایسا کرنے والے دوسرے لیفٹ آرم اسپنر بن گئے ہیں۔ تاہم جنوبی افریقی بلے باز متھوسامی (89) اور ربادا (71) کی آخری وکٹ پر 98 رنز کی شراکت نے مہمان ٹیم کو 404 کے مجموعے تک پہنچایا، جس کے بعد انہیں 71 رنز کی برتری حاصل ہوئی۔
پاکستان کی دوسری اننگز میں اوپنرز امام الحق، شان مسعود، عبداللہ شفیق اور سعود شکیل ناکام رہے۔ بابر اعظم اور رضوان نے سنبھال کر کھیلتے ہوئے پاکستان کو ابتدائی دھچکوں سے نکالا۔
کیشو مہاراج نے پہلی اننگز میں 7 وکٹیں حاصل کر کے پاکستان کے بیٹرز کو پریشان کیے رکھا، وہ پاکستان کے خلاف یہ کارنامہ انجام دینے والے دوسرے جنوبی افریقی اسپنر بن گئے۔ پاکستان نے پہلی اننگز میں 333 رنز اسکور کیے تھے۔
اس سے قبل پاکستان نے ٹاس جیت کر بیٹنگ کا فیصلہ کیا تھا، جہاں شان مسعود نے 87، عبداللہ شفیق نے 57 اور سعود شکیل نے 66 رنز کی اننگز کھیلی۔
ٹیسٹ ڈیبیو کرنے والے آصف آفریدی نے 39 سال کی عمر میں شاندار کارکردگی کا مظاہرہ کرتے ہوئے اپنی پہلی ہی اننگز میں پانچ وکٹیں حاصل کیں۔
پاکستان ٹیم سیریز میں 0-1 سے برتری حاصل کیے ہوئے ہے اور راولپنڈی ٹیسٹ جیت کر کلین سویپ کا عزم لیے میدان میں ہے۔