اسلام آباد: مقبوضہ کشمیر کے علاقے پہلگام میں فائرنگ کے افسوسناک واقعے میں 27 سیاحوں کے جاں بحق ہونے پر پاکستان کے دفتر خارجہ نے گہری تشویش کا اظہار کیا ہے۔
ترجمان وزارت خارجہ، شفقت علی خان نے میڈیا کے سوالات کے جواب میں کہا کہ پاکستان اس سانحے پر دکھ اور افسوس کا اظہار کرتا ہے، اور جاں بحق افراد کے لواحقین سے دلی تعزیت کرتا ہے۔ ترجمان نے زخمی ہونے والوں کی جلد صحت یابی کی دعا بھی کی۔
خیال رہے کہ یہ واقعہ ضلع اننت ناگ میں پیش آیا جہاں نامعلوم مسلح افراد نے سیاحتی مقام پہلگام میں فائرنگ کر کے سیاحوں کو نشانہ بنایا اور موقع سے فرار ہو گئے۔ کشمیر میڈیا سروس کے مطابق یہ حملہ وادی بائی سرن میں تفریح کے لیے آئے افراد پر کیا گیا۔
حملے کے بعد بھارتی میڈیا نے بغیر کسی ثبوت کے پاکستان پر الزامات کی بوچھاڑ شروع کر دی۔ سوشل میڈیا پر بھی "پاکستان کا ہاتھ" کا بیانیہ بغیر تحقیق کے پھیلایا گیا، جبکہ بھارتی ٹی وی چینلز نے اسے "پاکستانی دہشت گردی" قرار دے کر پیش کیا۔
پاکستان نے واقعے کی مذمت کرتے ہوئے واضح کیا کہ اس طرح کے الزامات حقائق پر مبنی نہیں اور صرف سیاسی مقاصد کے لیے استعمال کیے جا رہے ہیں۔