ڈیرہ غازی خان : پنجاب پولیس نے ڈیرہ غازی خان کے سرحدی علاقے میں واقع تھانہ وہوا کی جھنگی پولیس چیک پوسٹ پر خوارجی دہشت گردوں کا بڑا حملہ کامیابی سے پسپا کر دیا۔ ترجمان پنجاب پولیس کے مطابق، رات کے وقت 20 سے 25 دہشت گردوں نے راکٹ لانچرز اور جدید خودکار اسلحے سے پولیس چوکی پر حملہ کیا۔
پولیس کے الرٹ اہلکاروں نے دہشت گردوں کی جانب سے کیے گئے حملے کا زبردست مقابلہ کیا اور جوابی فائرنگ کی، جس کے نتیجے میں دہشت گرد پسپا ہو کر فرار ہونے میں کامیاب ہو گئے۔ پولیس ترجمان کے مطابق، اس جوابی کارروائی میں دہشت گردوں کو جانی نقصان پہنچنے کی اطلاعات ہیں۔
آر پی او ڈیرہ غازی خان سجاد منج اور ڈی پی او ڈیرہ غازی خان سید علی بھی موقع پر موجود تھے اور آپریشن کی قیادت کی۔ پولیس نے مفرور دہشت گردوں کی تلاش کے لیے علاقے میں سرچ آپریشن شروع کر دیا ہے۔
پنجاب کے آئی جی ڈاکٹر عثمان انور نے حملہ ناکام بنانے پر ڈیرہ غازی خان پولیس کی تعریف کی اور کہا کہ جھنگی چیک پوسٹ کو پنجاب حکومت کی فنڈنگ سے مزید محفوظ بنایا گیا ہے، جہاں اضافی نفری اور جدید اسلحہ پہلے ہی فراہم کیا جا چکا ہے۔ آئی جی پنجاب نے یہ بھی کہا کہ پنجاب پولیس کے بہادر اہلکار ملک و قوم کے دشمنوں کے سامنے ایک مضبوط دیوار کی طرح ہیں۔