نیویارک :اقوام متحدہ میں پاکستان کے مستقل مندوب عاصم افتخار نے سلامتی کونسل میں یوکرین کے معاملے پر بریفنگ دیتے ہوئے واضح کیا ہے کہ پاکستان ہمیشہ سے عالمی سطح پر تنازعات کے پرامن حل اور مذاکرات کا حامی رہا ہے۔
عاصم افتخار نے کہا کہ پاکستان ہر اس اقدام کی حمایت کرے گا جو اختلافات کو ختم کرنے اور امن کے قیام میں مددگار ثابت ہو، چاہے وہ یوکرین کا معاملہ ہو یا دنیا کا کوئی اور خطہ۔ انہوں نے تمام فریقین پر زور دیا کہ وہ اشتعال انگیزی کے بجائے احتیاط سے کام لیں اور مذاکرات و سفارت کاری کے ذریعے مسائل کا حل نکالیں۔
پاکستانی مندوب نے عالمی برادری کو یاد دلایا کہ دیرپا امن کے لیے بین الاقوامی قوانین اور اقوام متحدہ کے چارٹر کے اصولوں کی مکمل پاسداری لازمی ہے۔
عاصم افتخار کا پیغام: "پاکستان کا اصولی موقف ہے کہ جنگ کے بجائے کشیدگی میں کمی اور مفاہمت کے ذریعے ہی عالمی استحکام ممکن ہے۔"