اسلام آباد: وفاقی وزیر اطلاعات و نشریات فواد چودھری نے کہا ہے کہ آج ملک کا ہر شہری پاکستان اور بھارت کے میچ کو لے کر پرُجوش ہے ۔ انشاللہ جیت جنون اور جذبے کی ہو گی پاکستان کی ہو گی ۔
اپنی ٹویٹ میں فواد چودھری نے کہا کہ میچ پر جانے کی تیاری کر رہا ہوں ، آج پاکستان کے جو بھی گیارہ لڑکے میدان میں اتریں گے ان کے پاس پاکستان کا نیا سپر سٹار بننے کا موقع ہے ۔
میچ پر جانے کی تیاری کر رہا ہوں،آج پاکستان کے جو بھی گیارہ لڑکے میدان میں اتریں گے ان کے پاس پاکستان کا نیا سپر سٹار بننے کا موقع ہے ، پاکستان کا ہر شہری اس میچ کو لے کر پرجوش ہے اور انشاللہ٘ جیت جنون اور جذبے کی ہو گی پاکستان کی ہو گی
— Ch Fawad Hussain (@fawadchaudhry) October 24, 2021
ادھر ، وزیر جیل خانہ جات پنجاب فیاض الحسن چوہان نے کہا کہ آج پوری پاکستانی قوم اپنی کرکٹ ٹیم کے شانہ بشانہ کھڑی ہے ۔ بوڑھوں سے لے کر بچوں تک ہر کے لبوں پر دعاؤں کے پھول ہیں ۔
اپنے ٹویٹ میں انہوں نے کہا کہ آج پوری دنیائے کرکٹ کی نظریں پاک انڈیا کرکٹ میچ پر لگی ہوئی ہیں ۔ یہ اس بات کی واضح نشانی ہے کہ عالمی سطح پر پاکستان اور کرکٹ لازم وملزوم ہیں ۔ پاکستان کرکٹ ٹیم زندہ باد ۔
آج پوری پاکستانی قوم اپنی کرکٹ ٹیم کے شانہ بشانہ کھڑی ہے۔ بوڑھوں سے لےکر بچوں تک ہر کے لبوں پر دعاؤں کے پھول ہیں۔آج پوری دنیائے کرکٹ کی نظریں پاک انڈیا کرکٹ میچ پر لگی ہوئی ہیں۔یہ اس بات کی واضح نشانی ہے کہ عالمی سطح پرپاکستان اور کرکٹ لازم وملزوم ہیں۔پاکستان کرکٹ ٹیم زندہ باد۔!!
— Fayaz ul Hassan Chohan (@Fayazchohanpk) October 24, 2021
دوسری جانب ، وفاقی وزیر داخلہ شیخ رشید کو پاک بھارت میچ دبئی اسٹیڈیم میں نہ دیکھ سکنے کا دکھ لگ گیا ، کہا ابھی دبئی ہوٹل پہنچا ہی تھا کہ ملکی صورتحال کے باعث واپس آنا پڑا ۔
انہوں نے مزید کہا کہ آپ خود سوچیں ، کسی شیخ کا ٹکٹ ضائع ہوجائے تو اسے کتنا دکھ لگے گا ۔ خاص طور پر جب میچ کا ٹکٹ اپنے پیسے سے خریدا ہو ۔
واضح رہے کہ ٹی ٹوئنٹی ورلڈ کپ کا سب سے بڑا مقابلہ آج کھیلا جائے گا ۔ دبئی کے میدان میں روایتی حریف ٹیمیں پاکستان اور انڈیا میدان میں اتریں گی ۔ یہ سنسنی خیز مقابلہ رات 7 بجے شروع ہوگا ۔
انڈیا کیخلاف میچ میں قومی ٹیم کی قیادت بابراعظم کریں گے جبکہ دیگر کھلاڑیوں میں حارث رؤف ، شاہین شاہ آفریدی ، حسن علی ، عماد وسیم ، شاداب خان ، آصف علی ، محمد حفیظ ، شعیب ملک ، حیدر علی ، فخر زمان اور محمد رضوان شامل ہیں ۔
