دبئی : آرٹیفیشل انٹیلجنس (AI) کی ترقی کے باوجود خلیجی ممالک میں 2030 تک لاکھوں محنت کشوں کی ضرورت پیش آئے گی۔ ایک مشترکہ امریکی اور برطانوی تحقیقی رپورٹ کے مطابق، خلیجی ممالک میں محنت کشوں کی تعداد میں قابل ذکر اضافہ متوقع ہے، اور 2030 تک ان ممالک کو 15 لاکھ سے زائد محنت کشوں کی ضرورت ہو گی۔
رپورٹ میں بتایا گیا ہے کہ متحدہ عرب امارات میں آرٹیفیشل انٹیلجنس کے نفاذ کے باوجود لاکھوں محنت کش درکار ہوں گے۔ متحدہ عرب امارات میں افرادی قوت میں 12 فیصد اضافے کا امکان ہے، جبکہ سعودی عرب میں بھی افرادی قوت میں 11 فیصد اضافے کی پیشگوئی کی گئی ہے۔
تحقیق کے مطابق، خلیجی ممالک میں بڑھتی ہوئی ترقی اور تعمیراتی منصوبوں کے لیے انسانی افرادی قوت کی ضرورت رہے گی، حالانکہ ٹیکنالوجی کے استعمال سے کئی شعبوں میں کام کا طریقہ تبدیل ہوگا۔ لیکن اس کے باوجود، محنت کشوں کی کمی کو پورا کرنے کے لیے لاکھوں افراد کی ضرورت پڑے گی، جو مختلف صنعتوں میں کام کر سکیں۔