کراچی : کراچی کے معروف صنعتی علاقے سائٹ ایریا میں واقع ایک ٹیکسٹائل فیکٹری میں اچانک آگ بھڑک اٹھی، جس نے دیکھتے ہی دیکھتے فیکٹری کے بڑے حصے کو اپنی لپیٹ میں لے لیا۔ آگ کی شدت کو مدنظر رکھتے ہوئے فائر بریگیڈ حکام نے اسے تیسرے درجے کی آگ قرار دے دیا ہے۔
چیف فائر آفیسر ہمایوں احمد کے مطابق، ابتدائی طور پر 6 فائر ٹینڈرز کو آپریشن کے لیے روانہ کیا گیا تھا، تاہم آگ کی تیزی کو دیکھتے ہوئے اب شہر بھر کے فائر اسٹیشنز سے گاڑیاں طلب کر لی گئی ہیں۔ بلند مقامات پر لگی آگ پر قابو پانے کے لیے اسنارکل اور پانی کی کمی کو پورا کرنے کے لیے واٹر باؤزرز بھی موقع پر پہنچا دیے گئے ہیں۔
واقعے کی اطلاع ملتے ہی آئی جی سندھ جاوید عالم نے پولیس کے اعلیٰ حکام کو فوری طور پر جائے وقوعہ پر پہنچنے کے احکامات جاری کیے۔ آئی جی سندھ کی جانب سے جاری کردہ اعلامیہ میں ہدایت دی گئی ہے کہ فیکٹری کے اندر پھنسے افراد کا فوری انخلاء یقینی بنایا جائے۔ آس پاس کی عمارتوں اور فیکٹریوں کو محفوظ بنانے کے لیے علاقے کی ناکہ بندی کی جائے۔
ریسکیو آپریشن میں فائر بریگیڈ کی ٹیموں کو مکمل معاونت فراہم کی جائے۔
نقصانات کا خدشہ
ٹیکسٹائل فیکٹری میں کپڑے اور دیگر آتش گیر مادوں کی موجودگی کے باعث آگ پر قابو پانے میں مشکلات کا سامنا ہے۔ فی الحال کسی جانی نقصان کی تصدیق نہیں ہوئی ہے، تاہم فیکٹری میں موجود لاکھوں روپے مالیت کا کپڑا اور مشینری خاکستر ہونے کا خدشہ ہے۔