اسلام آباد: وزیر اعظم شہباز شریف کی زیرصدارت وفاقی کابینہ کا اجلاس آج (بروز بدھ) صبح 11 بجے وزیر اعظم ہاؤس میں ہوگا۔ اجلاس میں ملکی سیاسی اور معاشی صورتحال سمیت 12 نکاتی ایجنڈے پر غور بھی کیا جائے گا۔
کابینہ میں پاکستان آرڈیننس فیکٹری اور ہیوی انڈسٹریز ٹیکسلا بورڈ کے ممبران کی تقرری کی منظوری دی جائے گی۔ اس کے علاوہ، بین الاقوامی تنازعات کے حل کے لیے کنونشن پر دستخط اور پاکستان و ہنگری کے درمیان تجارتی سرگرمیوں کے لیے معاہدے پر دستخط کرنے کی بھی منظوری دی جائے گی۔
وزارت صنعت و پیداوار اور بین الاقوامی مالیاتی کارپوریشن کے درمیان ای-موبلٹی پر تعاون کے معاہدے پر دستخط کرنے کی منظوری ایجنڈے میں شامل ہے۔ اسلام آباد ہائی کورٹ کی ہدایات سے متعلق وزارت داخلہ کی سمری کی منظوری بھی زیرغور آئے گی۔
کابینہ وسل بلور پروٹیکشن اینڈ ویجیلنس کمیشن ایکٹ 2025 پر بھی غور کرے گی اور چیئرمین پاکستان ٹوبیکو بورڈ (PTB) کے اضافی چارج کی تفویض سے متعلق فیصلہ کرے گی۔
مزید برآں، انکم ٹیکس ترمیمی بل 2025 کے ذریعے کل وقتی اساتذہ اور محققین کی آمدنی پر ٹیکس چھوٹ کی بحالی کی منظوری، کابینہ کمیٹی برائے نجکاری کے فیصلوں کی توثیق اور اقتصادی رابطہ کمیٹی کے اجلاسوں کے فیصلوں کی توثیق بھی ایجنڈے میں شامل ہیں۔