ابوظہبی :ابوظہبی کے ولی عہد شہزادہ شیخ خالد بن محمد بن زید النہیان آج پاکستان کا ایک روزہ دورہ کریں گے۔ سفارتی ذرائع کے مطابق، ولی عہد شہزادہ شیخ خالد اسلام آباد پہنچیں گے، جہاں انہیں پاکستان کے سب سے بڑے اعزاز "نشان پاکستان" سے نوازا جائے گا۔ اس موقع پر ایک خصوصی تقریب کا بھی انعقاد کیا جائے گا۔
دورہ پاکستان کے دوران، شہزادہ شیخ خالد بن محمد بن زید النہیان کی وزیراعظم شہباز شریف سے ملاقات متوقع ہے۔ اس ملاقات میں دونوں رہنماؤں کے درمیان اہم مفاہمتی یادداشت پر دستخط ہونے کا امکان بھی ظاہر کیا جا رہا ہے۔
شیخ خالد بن محمد بن زید النہیان ابوظہبی کی سپریم کونسل برائے مالیاتی و اقتصادی امور کے رکن ہیں اور وہ ابوظہبی نیشنل آئل کمپنی (ADNOC) کے بورڈ ممبر بھی ہیں۔ اس کے علاوہ، وہ ابو ظہبی انویسٹمنٹ اتھارٹی کے بورڈ آف ڈائریکٹرز کے رکن ہیں اور نیشنل سکیورٹی کے سربراہ اور ڈپٹی نیشنل سکیورٹی ایڈوائزر کے طور پر بھی ذمہ داریوں کو ادا کر چکے ہیں۔
مارچ 2023 میں شیخ خالد کو ابوظہبی کا ولی عہد اور ابو ظہبی ایگزیکٹو کونسل کا چیئرمین مقرر کیا گیا تھا۔ ان کا یہ دورہ پاکستان کے لیے کاروبار، تجارت، اور سرمایہ کاری لانے کے حوالے سے بہت اہمیت کا حامل ہے۔