راولپنڈی : پاکستان کی مسلح افواج نے 27 فروری 2019 کو بھارت کی بلاجواز فضائی دراندازی کا تاریخ ساز جواب دیا تھا، اور اسی دن آپریشن سوئفٹ ریٹارٹ کی کامیابی کی 6 سالہ سالگرہ منائی جا رہی ہے۔ یہ دن پاکستان کے لئے نہ صرف اپنی خودمختاری کے دفاع کا عزم ثابت کرنے والا دن ہے بلکہ بھارت کی جارحیت کا مؤثر اور مضبوط جواب دینے کا دن بھی ہے۔
26 فروری 2019 کو بھارت نے سرجیکل سٹرائیک کا جھوٹا دعویٰ کرتے ہوئے پاکستانی فضائی حدود کی خلاف ورزی کی تھی۔ تاہم 27 فروری کو پاک فضائیہ نے دن کی روشنی میں بھارتی فضائیہ کی دراندازی کا مؤثر جواب دیا، جس کے نتیجے میں دو بھارتی لڑاکا طیارے مار گرائے گئے، اور بھارتی پائلٹ ابھی نندن کو گرفتار کر لیا گیا۔
پاک فوج کے شعبہ تعلقات عامہ (آئی ایس پی آر) کے مطابق، آپریشن سوئفٹ ریٹارٹ نے پاکستان کی مسلح افواج کی آپریشنل مہارت، تیاری اور فوری ردعمل کی صلاحیت کو اجاگر کیا۔ عسکری قیادت نے آپریشن میں مسلح افواج کی قربانیوں، حوصلے اور پروفیشنلزم کو سراہا۔ اس آپریشن نے پاکستان کی خودمختاری اور علاقائی سالمیت کے تحفظ کے عزم کو مزید مضبوط کیا۔
چیئرمین جوائنٹ چیفس آف اسٹاف اور سروسز چیفس نے مسلح افواج کو خراج تحسین پیش کیا اور کہا کہ یہ آپریشن پاکستان کی قومی سلامتی اور استحکام کو یقینی بنانے کی عکاسی کرتا ہے۔ عسکری قیادت نے اس بات کا اعادہ کیا کہ پاکستان کی مسلح افواج کسی بھی خطرے کا مقابلہ کرنے کے لئے مکمل طور پر تیار ہیں اور اپنے عوام کے اعتماد پر پورا اترتے ہوئے اپنی ذمہ داریوں کو بخوبی نبھائیں گی۔
آئی ایس پی آر کے مطابق، اس معرکے میں پاکستان کی مسلح افواج نے مکمل آپریشنل غلبہ برقرار رکھا، اور عسکری قیادت نے علاقائی امن کے قیام کی کوششوں کو مزید فروغ دینے کی اہمیت پر زور دیا۔ پاکستان کی مسلح افواج مادر وطن کے تحفظ کے لئے غیرمتزلزل عزم کے ساتھ بھرپور تیار ہیں۔