لاہور: پاکستانی اداکارہ ماہرہ خان طویل عرصے کے بعد اپنے شوہر سلیم کریم کے ہمراہ ایک عوامی تقریب میں نظر آئیں، جس سے انہوں نے فوراً سب کی توجہ حاصل کر لی۔ یہ موقع ماہرہ خان کی نئی فلم نیلوفر کی تشہیر کے سلسلے میں منعقد ہونے والی تقریب کا تھا، جہاں وہ نہ صرف اپنے مرکزی کردار کی وجہ سے توجہ کا مرکز بنیں بلکہ اس بار وہ اپنے شوہر کے ساتھ اسٹیج پر نظر آئیں۔
ماہرہ خان نے اپنے شوہر سلیم کریم کا ہاتھ تھاما ہوا تھا اور دونوں نے اسٹیج پر آ کر فوٹو شوٹ کروایا۔ ماہرہ اس تقریب میں سیاہ رنگ کی خوبصورت ساڑھی میں ملبوس تھیں، جبکہ سلیم کریم نے بھی کالے رنگ کا پینٹ کوٹ پہنا ہوا تھا۔
جوڑے کی ہم آہنگی اور ایک دوسرے کے ساتھ کیمسٹری نے تقریب میں موجود افراد کی توجہ حاصل کی۔ ایک موقع پر ماہرہ خان اپنے شوہر کا ہاتھ نوبیاہتا دلہن کی طرح تھامے ہوئے نظر آئیں، جو کہ سب کے لیے ایک دلکش لمحہ تھا۔
یہ لمحہ خاص تھا کیونکہ ماہرہ خان اور سلیم کریم کی جوڑی طویل عرصے بعد ایک ساتھ عوامی طور پر سامنے آئی تھی، اور ان کی ہم آہنگی نے محفل میں مزید رنگ بھرا۔