ڈی آئی خان: ڈیرہ اسماعیل خان کے علاقے درازندہ میں امن میلہ چیک پوسٹ پر مبینہ خودکش حملے میں خواتین اور کم سن بچی سمیت 13 افراد شہید جبکہ 35 زخمی ہوگئے۔ مختلف سرکاری و میڈیا رپورٹس میں ابتدائی طور پر ہلاکتوں کی تعداد مختلف بتائی گئی، تاہم تازہ رپورٹنگ میں 13 شہادتوں کی اطلاع ہے۔
ذرائع کے مطابق بارود سے بھری گاڑی کو انسدادِ اسمگلنگ چیک پوسٹ سے ٹکرایا گیا، جس کے نتیجے میں شدید دھماکا ہوا اور قریبی مکان بھی متاثر ہوا۔ دھماکے کے بعد سکیورٹی اہلکاروں اور حملہ آوروں کے درمیان فائرنگ بھی ہوئی۔
شہداء میں کم سن بچی گل ورینہ اور اس کی والدہ سمیت خواتین اور ایک بچہ بھی شامل ہیں۔ ریسکیو ٹیموں نے زخمیوں کو ہسپتال منتقل کیا، جبکہ 35 زخمیوں میں سے متعدد کو ڈی ایچ کیو ٹیچنگ اسپتال ڈیرہ اسماعیل خان منتقل کیا گیا۔
دوسری جانب دھماکے کے متاثرین کو منتقل کرنے والی ریسکیو 1122 کی ایمبولینس پر بھی فائرنگ کی گئی۔ سکیورٹی ذرائع کے مطابق فائرنگ کے نتیجے میں دو ریسکیو اہلکار شہید ہوئے۔
واقعے پر صدر مملکت، وزیراعظم، وزیر داخلہ اور دیگر حکومتی رہنماؤں نے مذمت اور شہداء کے لواحقین سے اظہارِ تعزیت کیا۔ حکومت کی جانب سے دہشت گردی کے خلاف کارروائیاں جاری رکھنے کے عزم کا اظہار بھی کیا گیا