کیلیفورنیا : میٹا کی زیر ملکیت مقبول میسجنگ ایپ واٹس ایپ نے اینڈرائیڈ صارفین کے لیے ایپ کے نیویگیشن بار کے نئے ڈیزائن کی آزمائش شروع کردی ہے۔ نئے ڈیزائن میں نیویگیشن بار کو فلوٹنگ انداز اور گول کناروں کے ساتھ دکھایا گیا ہے۔
یہ نیا انٹرفیس واٹس ایپ کے اینڈرائیڈ بیٹا ورژن 2.26.38.10 میں متعارف کرایا گیا ہے۔ نئے ڈیزائن کے تحت نیویگیشن بار ایپ کے باقی حصوں سے قدرے نمایاں اور الگ نظر آتا ہے، جبکہ اس کے کناروں کو بھی گول شکل دی گئی ہے۔
واٹس ایپ نے 2023 میں بیٹا ورژن 2.23.10.6 کے ذریعے چیٹس، کمیونٹیز، اپ ڈیٹس اور کالز کو سکرین کے نچلے حصے میں موجود نیویگیشن بار پر منتقل کیا تھا۔ اب تقریباً تین سال بعد کمپنی نے اسی انٹرفیس میں ایک اور تبدیلی کی جانب پیش رفت کی ہے۔
نیا ڈیزائن آئی فون پر موجود واٹس ایپ کے فلوٹنگ ٹیب بار سے ملتا جلتا ہے، تاہم اینڈرائیڈ ورژن میں گوگل کے ڈیزائن اصولوں کو مدنظر رکھا گیا ہے۔
رپورٹس کے مطابق فی الحال یہ تبدیلی لائٹ تھیم میں زیادہ واضح دکھائی دیتی ہے، جبکہ ڈارک موڈ میں اس کا فرق نسبتاً کم محسوس ہوتا ہے۔
واٹس ایپ کی جانب سے یہ تجربہ ایسے وقت میں کیا جا رہا ہے جب بعض اینڈرائیڈ صارفین ایپ کے موجودہ انٹرفیس میں مزید جدت اور جدید ڈیزائن کے خواہاں ہیں۔ واٹس ایپ کی بیٹا اپ ڈیٹس پر نظر رکھنے والی ویب سائٹ واٹس ایپ بیٹا انفو نے بھی حالیہ دنوں میں صارفین سے اینڈرائیڈ انٹرفیس کے حوالے سے رائے طلب کی تھی۔