اسلام آباد: ملک بھر کے بجلی صارفین کے لیے بُری خبر، جولائی کی فیول ایڈجسٹمنٹ کی مد میں بجلی کی قیمت میں 62 پیسے فی یونٹ اضافے کا امکان ہے۔سینٹرل پاور پرچیزنگ ایجنسی نے بجلی کی قیمت بڑھانے کی درخواست کی ہے۔
نیشنل الیکٹرک پاور ریگولیٹری اتھارٹی (نیپرا) کی جانب سے سینٹرل پاور پرچیزنگ ایجسی کی درخواست پر کل سماعت کی جائے گی۔نیپرا کے مطابق درخواست جولائی کی فیول ایڈجسٹمنٹ کی مد میں کی گئی ہے، جولائی میں فی یونٹ بجلی کی پیداواری لاگت کا اوسط تخمینہ 4 روپے 98 پیسے مقرر تھا تاہم فی یونٹ بجلی کی اوسط فیول لاگت 5 روپے 60 پیسے رہی۔
نیشنل الیکٹرک پاور ریگولیٹری اتھارٹی کے حکام کا کہنا ہے کہ سینٹرل پاور پرچیزنگ ایجنسی کی درخواست کے مطابق جولائی میں 24.51 فیصد بجلی ایل این جی پر پیدا کی گئی جب کہ کوئلے سے 12.63 فیصد اور فرنس آئل سے 9.34 فیصد بجلی پیدا کی گئی۔نیپرا کے مطابق نیوکلیئر ذرائع سے 5.35 فیصد اور ہوا سے 3.12 فیصد بجلی پیدا ہوئی، جولائی میں مجموعی طور پر پونے 14 ارب یونٹ بجلی پیدا ہوئی۔
