اسلام آباد: وزارت خزانہ نے اپنی ماہانہ معاشی آؤٹ لک رپورٹ جاری کی ہے، جس میں بتایا گیا ہے کہ نومبر میں پاکستان کی مہنگائی کی شرح 5 سے 6 فیصد کے درمیان رہنے کی توقع ہے۔ رپورٹ کے مطابق، پاکستان کی معاشی صورتحال محتاط طور پر مثبت دکھائی دے رہی ہے، اور اقتصادی سرگرمیوں میں بتدریج بہتری آ رہی ہے۔
رپورٹ میں کہا گیا کہ ایل ایس ایم (لارج اسکیل مینوفیکچرنگ) سیکٹر اور آئی ٹی کی برآمدات میں اضافہ ہوا ہے، جبکہ حکومت کی اصلاحات کے باعث مالی استحکام نظر آ رہا ہے۔ ان اصلاحات سے نہ صرف معیشت کو استحکام مل رہا ہے بلکہ زرعی اور صنعتی شعبے میں بھی بہتری متوقع ہے۔
رپورٹ کے مطابق، خوراک کی قیمتوں اور زرعی آؤٹ پٹ پر دباؤ رہا ہے، تاہم حکومت کے اقدامات سے سپلائی کی صورتحال میں بہتری کی امید ہے۔ خاص طور پر ربیع سیزن کے دوران زرعی سپلائی کے استحکام کی توقع ہے۔
وزارت خزانہ نے یہ بھی بتایا کہ عوامی قرضہ 1371 ارب روپے کم ہو چکا ہے، اور پانچ سال کے بعد پہلی بار کسی سہ ماہی میں قرضے میں نمایاں کمی آئی ہے۔ رپورٹ میں کہا گیا کہ مہنگے قرضوں کی قبل از وقت ادائیگی سے مالی خطرات میں کمی کا امکان ہے، جس سے حکومت کو مزید مالی استحکام حاصل ہو گا۔
رپورٹ کے مطابق، معیشت بتدریج استحکام کی راہ پر گامزن ہے اور ساختی اصلاحات کے عملی نتائج سامنے آنا شروع ہو گئے ہیں۔ مالی نظم و ضبط میں بہتری آئی ہے اور حکومت کے اخراجات میں محتاط حکمت عملی اختیار کی جا رہی ہے، جس سے مالی خسارے میں کمی آ رہی ہے۔
وزارت خزانہ کا کہنا ہے کہ ترسیلات زر میں اضافہ دیکھنے کو مل رہا ہے، جس سے معاشی صورتحال مزید مستحکم ہو رہی ہے۔ حکومت کے اقتصادی اقدامات کے اثرات جلد ہی واضح ہونے کی توقع ہے، اور اس سے مجموعی طور پر ملک کی اقتصادی صورتحال میں مزید بہتری آ سکتی ہے۔