بیروت: لبنان کی مزاحمتی تنظیم حزب اللہ نے ایک بار پھر یہ واضح کر دیا ہے کہ وہ نہ تو جنوبی لبنان سے پیچھے ہٹے گی اور نہ ہی اپنے ہتھیار ڈالے گی۔ حزب اللہ کے نائب سربراہ نعیم قاسم نے اپنے تازہ بیان میں کہا کہ تنظیم اسرائیل کے خلاف لبنانی عوام کے دفاع میں اپنی مزاحمت جاری رکھے گی اور کسی بھی قسم کے دباؤ کو قبول نہیں کرے گی۔
نعیم قاسم نے کہا کہ اسرائیل مسلسل لبنانی سرزمین پر حملے کر رہا ہے، جو کہ جنگ بندی معاہدے کی کھلی خلاف ورزی ہے۔ ان کا مطالبہ تھا کہ اسرائیل فوری طور پر جنگ بندی معاہدے پر مکمل عمل درآمد کرے اور لبنان پر فضائی و زمینی حملے بند کرے۔ ان کے مطابق حزب اللہ کی مزاحمت کا مقصد لبنانی عوام کا تحفظ ہے اور یہ جدوجہد اس وقت تک جاری رہے گی جب تک اسرائیلی جارحیت ختم نہیں ہوتی۔
حزب اللہ کے رہنما نے امریکا پر بھی شدید تنقید کی اور الزام لگایا کہ امریکا لبنان پر مکمل کنٹرول حاصل کرنے کے لیے اسرائیل کا استعمال کر رہا ہے۔ انہوں نے کہا کہ خطے میں عدم استحکام کی بڑی وجہ امریکی پالیسیاں ہیں، جو اسرائیل کو کھلی حمایت فراہم کر رہی ہیں۔
نعیم قاسم نے مزید کہا کہ حزب اللہ کسی صورت میں جنوبی لبنان سے انخلا نہیں کرے گی، کیونکہ یہ علاقہ لبنان کی خودمختاری کا اہم حصہ ہے۔ ان کے مطابق، حزب اللہ کی مزاحمت نہ صرف ایک دفاعی حکمت عملی ہے بلکہ یہ لبنانی قوم کے وقار اور آزادی کی علامت بھی ہے۔
دوسری جانب خطے میں کشیدگی بدستور برقرار ہے، اور عالمی برادری کی جانب سے فریقین کو تحمل کا مظاہرہ کرنے اور جنگ بندی کی پاسداری کی درخواست کی جا رہی ہے۔ مبصرین کا کہنا ہے کہ اگر حالات میں مزید بگاڑ آیا تو مشرق وسطیٰ میں تنازع مزید وسیع ہو سکتا ہے، جس کے اثرات عالمی سطح پر محسوس کیے جا سکتے ہیں۔