اسلام آباد: ٹک ٹاک نے پاکستان میں 2025 کے دوران سب سے زیادہ سرچ کیے جانے والے موضوعات کی سالانہ جائزہ رپورٹ جاری کی ہے، جس میں سفر، کھانا، کرکٹ، فلمیں، موسیقی، اور تفریحی ڈیجیٹل سرچز شامل ہیں۔ رپورٹ کے مطابق، پاکستانی ٹک ٹاک کو نہ صرف تفریح کے لیے استعمال کر رہے ہیں بلکہ حقیقی زندگی کی دریافت کے لیے بھی اسے ایک اہم ذریعہ مانتے ہیں۔
ٹک ٹاک کے جنوبی ایشیا کانٹینٹ آپریشنز کے سربراہ، عمیس نوید نے کہا کہ پاکستانی عوام مختلف سرگرمیوں کے بارے میں معلومات حاصل کرنے کے لیے ٹک ٹاک کا رخ کرتے ہیں، چاہے وہ کرکٹ کے تازہ ترین لمحات ہوں، چھٹیوں کی سیر کی منصوبہ بندی ہو، نیا سیکھنے کی خواہش ہو، یا خریداری سے پہلے عوامی رائے اور جائزے چیک کرنے کی ضرورت ہو۔
رپورٹ کے مطابق، سب سے زیادہ سرچ کیے جانے والے مقامات میں اسلام آباد، ہنزہ کا قلعہ التیت، دریائے چناب اور لاہور و کراچی شامل تھے۔ خبریں اور کرکٹ کے لمحات میں پاکستان کے سابق کپتان بابر اعظم کی سری لنکا کے خلاف سنچری کی سب سے زیادہ تلاش کی گئی۔ اس کے علاوہ، جنوبی افریقہ اور سری لنکا کے خلاف پاکستان کے میچز بھی مقبول رہے، اور سیلاب سے متعلق معلومات بھی کافی تلاش کی گئیں۔
سب سے زیادہ تلاش کیے جانے والے نغمات میں پاکستانی گلوکار مانو اور انورال خالد کا "جھول" تھا، جبکہ بھارتی فنکار شوبھ کا "سپریم" اور Afusic کا "پل پل" بھی اس سال کی سب سے زیادہ سرچ کی جانے والی گانوں میں شامل رہے۔
کھانے کے شعبے میں سب سے زیادہ تلاش کی جانے والی اشیاء میں "لاوا برگر" اور "دبئی چاکلیٹ" شامل ہیں، جبکہ کرکٹرز میں بابر اعظم سب سے زیادہ سرچ کیے گئے، ان کے بعد بھارتی کرکٹر ابھیشیک شرما کا نام رہا۔
ٹک ٹاک کے تخلیق کاروں میں علینہ عامر، جنت مرزا، خضر عمر اور کنول آفتاب کو سب سے زیادہ تلاش کیا گیا، جبکہ شوبز شخصیات میں عمران اشرف، فہد مصطفیٰ اور ماہرہ خان کو نمایاں طور پر سرچ کیا گیا۔
ٹک ٹاک کی رپورٹ میں یہ بھی بتایا گیا کہ مختلف ہیش ٹیگ کے ساتھ سرچز میں اضافہ ہوا ہے، جیسے #TravelTok کے سرچز میں 53 فیصد، #FoodTok کے سرچز میں 52 فیصد، #StudyTok میں 60 فیصد اور #FitnessTok میں 66 فیصد اضافہ دیکھنے کو ملا۔
ٹک ٹاک نے اس بات پر زور دیا کہ اس کا مقصد پاکستان میں ایک تخلیقی کمیونٹی کو سہولت فراہم کرنا ہے، تاکہ ہر شخص کے لیے تلاش کو مزید آسان، دلچسپ اور بامعنی بنایا جا سکے۔