کیلیفورنیا:جدید ٹیکنالوجی میں انقلابی کردار ادا کرنے والی کمپنی اوپن اے آئی اب سوشل میڈیا کی دنیا میں قدم رکھنے کو تیار ہے۔ ذرائع کے مطابق، کمپنی ٹک ٹاک طرز کی ایک خفیہ ایپلی کیشن 'سورا 2' پر کام کر رہی ہے، جو مکمل طور پر اے آئی سے تیار کردہ ویڈیو فیڈ پیش کرے گی۔
بین الاقوامی نشریاتی اداروں رائٹرز اور وال سٹریٹ جرنل کی رپورٹس کے مطابق، یہ ایپ صارفین کو اوپن اے آئی کے ویڈیو جنریٹر "Sora" کے ذریعے 10 سیکنڈز تک کی مختصر ویڈیوز تخلیق کرنے کی سہولت دے گی۔دلچسپ بات یہ ہے کہ صارفین اپنی گیلری سے کوئی تصویر یا ویڈیو اپلوڈ نہیں کر سکیں گے ،تمام مواد خالصتاً مصنوعی ذہانت کے ذریعے تخلیق کیا جائے گا۔
ایپ میں ایک جدید شناختی تصدیق (identity verification) فیچر متعارف کرایا جائے گا، جس کے ذریعے صارفین اپنے چہرے کی تصدیق کر سکیں گے۔ تصدیق شدہ صارفین اپنی شخصی شناخت کو ویڈیوز میں شامل کر سکیں گے، اور دیگر صارفین بھی ان کی اجازت سے ان کے چہرے کو استعمال کر سکیں گے۔
ایک نمایاں پہلو یہ ہے کہ اگر کسی صارف کا چہرہ کسی ویڈیو میں شامل کیا جائے گا، تو اسے اس کی اطلاع دی جائے گی — چاہے وہ ویڈیو محض ڈرافٹ میں ہو اور پوسٹ نہ کی گئی ہو۔
ایپ میں کاپی رائٹ شدہ مواد کے استعمال کے لیے ایک ’opt-out‘ نظام بھی متعارف کرایا جا رہا ہے، جس کے تحت کسی تخلیق کار کو اپنے مواد کے استعمال سے روکنے کے لیے باضابطہ درخواست دینی ہوگی۔علاوہ ازیں، مشہور عوامی شخصیات کی تصاویر یا شکلیں ان کی اجازت کے بغیر استعمال نہیں کی جا سکیں گی۔
ذرائع کے مطابق، اوپن اے آئی نے یہ ایپ گزشتہ ہفتے اندرونی سطح پر لانچ کی، جہاں کمپنی کے ملازمین کی جانب سے ابتدائی فیڈبیک مثبت رہا۔
اگرچہ کمپنی نے تاحال اس منصوبے کی باضابطہ تصدیق نہیں کی، لیکن یہ پیش رفت ٹک ٹاک جیسے پلیٹ فارمز کے لیے ایک ممکنہ چیلنج بن سکتی ہے۔
جہاں یہ ایپلی کیشن سوشل میڈیا کی دنیا میں ایک نیا تجربہ بن سکتی ہے، وہیں صارف کی پرائیویسی، شناخت کا تحفظ، اور کاپی رائٹ قوانین جیسے اہم سوالات بھی پیدا ہوں گے۔