’دیکھو! شاہد آفریدی ہمارا مذاق اڑا رہا ہے‘ نیوزی لینڈ سے شکست پر بھارتیوں سے سچ بھی ہضم نہ ہوا

لاہور: انٹرنیشنل کرکٹ کونسل (آئی سی سی) ٹی 20 ورلڈکپ میں نیوزی لینڈ کے ہاتھوں بھارت کی شکست کے بعد بھارتی غصے میں اتنے سیخ پا ہیں کہ سچ بھی ہضم نہیں کر پا رہے اور پاکستان کے مایہ ناز آل راؤنڈر شاہد خان آفریدی کے حقائق پر مبنی تبصرے کو بھی ’ٹرولنگ‘ سمجھ رہے ہیں۔ 
شاہد خان آفریدی نے نیوزی لینڈ کے ہاتھوں بھارت کی شکست پر تبصرہ کرتے ہوئے کہا ہے کہ بھارت کے پاس سیمی فائنل میں کوالیفائی کرنے کا ایک موقع ہے مگر سب ہی جانتے ہیں کہ ایسا ہونا معجزہ ہی ہو گا اور شاہد آفریدی نے بھی اپنے تبصرے میں اسی لفظ کا استعمال کیا۔ اپنے ٹوئٹر پیغام میں شاہد آفریدی نے کہا کہ بھارت نے ایونٹ میں جس طرح دو بڑے میچز کھیلے ان کے ساتھ اسے سیمی فائنل میں دیکھنا معجزے کے سوا کچھ نہیں ہو گا۔ 

India still have an outside chance of qualifying for semis but with how they have played their two big games in the event, it will be nothing but a miracle to see them qualify. @T20WorldCup

— Shahid Afridi (@SAfridiOfficial) October 31, 2021

شاہد آفریدی کا تبصرہ حقائق پر مبنی ہے اور بھارت کے سابق کرکٹرز اور موجودہ کرکٹرز بھی اس بات سے متفق ہوں گے مگر بھارتی میڈیا سے شاہد آفریدی کا یہ تبصرہ ہضم کرنا مشکل ہو گیا ہے جس نے اسے بھارتی ٹیم اور بھارتیوں کی ’ٹرولنگ‘ قرار دیدیا ہے۔ 
واضح رہے کہ آئی سی سی ٹی 20 ورلڈکپ سپر 12 مرحلے کے گروپ 2 کے اہم میچ میں نیوزی لینڈ نے بھارت کو یکطرفہ مقابلے کے بعد 8 وکٹوں سے شکست دے کر اس کے ایونٹ کے سیمی فائنل تک پہنچنے کی امیدوں کو نہ ہونے کے برابر کر دیا ہے۔

کیویز نے بھارت کی جانب سے دیا گیا ہدف 15ویں اوور میں 8 وکٹوں کے نقصان پر حاصل کرلیا تھا جس کے بعد سوشل میڈیا پر بھارتی ٹیم کی خوب درگت بن رہی ہے۔