راولپنڈی: پاکستان تحریک انصاف (پی ٹی آئی) کے بانی عمران خان کی بہن، علیمہ خان، اور وکلا کے درمیان اڈیالہ جیل کے باہر تکرار کا واقعہ پیش آیا۔
علیمہ خان نے اڈیالہ جیل میں اپنے بھائی عمران خان سے ملاقات کی، جس کے بعد جیل کے داخلی گیٹ پر وکلا کے ساتھ ان کی تلخ کلامی ہوئی۔ علیمہ خان نے اس موقع پر کہا کہ صرف وہ لوگ عمران خان سے ملاقات کر سکتے ہیں جنہیں اس کی اجازت دی گئی ہو۔ ان کا کہنا تھا کہ ہر شخص جیل آ کر ملاقات نہیں کر سکتا، لیکن وہ اپنے بھائی کے لیے جان دینے کو تیار ہیں۔
انہوں نے یہ بھی کہا کہ کوئی وکیل اپنی طرف سے اضافی درخواستیں دائر نہیں کرے گا، کیونکہ عدالت میں درخواستیں دائر کرنے کا اختیار صرف سلمان اکرم اور سلمان صفدر کو حاصل ہے۔
علیمہ خان نے مزید بتایا کہ بانی پی ٹی آئی سے بچوں کی ٹیلیفونک بات نہیں کرائی جا رہی۔ اس پر ان کا کہنا تھا کہ نعیم پنجوتھہ، جو بشریٰ بی بی کے فوکل پرسن ہیں، کس کس سے ملاقات کرتے ہیں؟ نعیم پنجوتھہ نے جواب دیتے ہوئے کہا کہ وہ کسی سے ملاقات نہیں کرتے اور جیل کی صعوبتیں برداشت کر چکے ہیں۔
