کراچی: پاکستان پیڈل فیڈریشن کے زیرِ انتظام نیشنل پیڈل چیمپئن شپ 11 سے 13 اپریل تک کراچی کے ایک نجی پیڈل کورٹ میں منعقد کی گئی۔ تین روزہ مقابلوں میں ملک بھر سے مرد و خواتین کھلاڑیوں نے بڑھ چڑھ کر حصہ لیا، جس سے اس کھیل کی بڑھتی ہوئی مقبولیت واضح ہوئی۔
مردوں کی کیٹیگری میں کراچی کے عدیل اللہ والا اور ہشیش کمار نے شاندار کھیل کا مظاہرہ کرتے ہوئے چیمپئن شپ اپنے نام کی، جب کہ خواتین میں ثنا طابہ اور ناتالیا زمان نے بازی ماری۔ مکسڈ ڈبلز مقابلے میں اسلام آباد سے تعلق رکھنے والے سامی زیب اور سارہ منصور فاتح قرار پائے۔
اختتامی تقریب میں پاکستان پیڈل فیڈریشن کے سینئر نائب صدر مسرر رزاق آرائیں نے کھلاڑیوں میں انعامات اور ٹرافیاں تقسیم کیں۔ اپنے خطاب میں انہوں نے کہا کہ پیڈل کھیل کراچی، لاہور اور اسلام آباد جیسے شہروں میں تیزی سے مقبول ہو رہا ہے اور نوجوان نسل اس میں گہری دلچسپی لے رہی ہے۔
پیڈل کو عموماً ٹینس اور اسکواش کے امتزاج سے تعبیر کیا جاتا ہے، جس کے کئی اصول ٹینس سے مماثل اور کچھ اسکواش سے اخذ کیے گئے ہیں، جو اسے مزید دلچسپ اور منفرد بناتے ہیں۔
نیشنل چیمپئن شپ کے کامیاب انعقاد کو پاکستان میں پیڈل کے فروغ کی جانب ایک مثبت قدم سمجھا جا رہا ہے، اور امید کی جا رہی ہے کہ مستقبل قریب میں مزید مقابلے اور تربیتی کیمپس منعقد کیے جائیں گے۔
