اسلام آباد: وفاقی دارالحکومت میں شہریوں کی سہولت اور ٹریفک مسائل کے حل کے لیے متعدد ترقیاتی منصوبے شروع کرنے کا فیصلہ کیا گیا ہے۔ وفاقی وزیر داخلہ محسن نقوی کی زیر صدارت سی ڈی اے ہیڈکوارٹرز میں ایک اہم اجلاس ہوا، جس میں مختلف منصوبوں کی باقاعدہ منظوری دی گئی۔
اجلاس میں فیض آباد انٹرچینج کی ری ماڈلنگ کا فیصلہ کیا گیا ہے، جہاں دو نئی لینز کا اضافہ کر کے ٹریفک کے مسائل کم کرنے کی کوشش کی جائے گی۔ اسی طرح فیصل چوک پر انڈر پاس بنانے کا بھی فیصلہ کیا گیا ہے، جس سے ٹریفک کی روانی بہتر بنانے میں مدد ملے گی۔
بلیو ایریا میں مکمل شدہ پارکنگ پلازہ کو جلد فعال کرنے کا حکم بھی دیا گیا ہے، جہاں پارکنگ کے ساتھ ساتھ کمرشل دکانیں، روف ٹاپ ریسٹورنٹ، پلے لینڈ، سینما اور دیگر سہولیات فراہم کی جائیں گی۔ بلیو ایریا میں فوڈ سٹریٹ کے لیے بھی مخصوص جگہیں مختص کر دی گئی ہیں، جہاں پیدل چلنے کے لیے ٹریکس، بیٹھنے کے لیے بینچز اور تفریحی سرگرمیوں کی سہولیات شامل ہوں گی۔
محسن نقوی نے ہدایت دی کہ پارکنگ پلازہ اور فوڈ سٹریٹ کے لیے ایک جدید اور منافع بخش بزنس ماڈل تیار کیا جائے، تاکہ ان منصوبوں کو طویل مدتی بنیاد پر کامیابی سے چلایا جا سکے۔ اجلاس میں شہر کے دوسرے حصوں میں بھی پارکنگ پلازوں کی تعمیر کی منظوری دی گئی اور فوری طور پر مقامات کی نشاندہی کرنے کی ہدایت جاری کی گئی۔
اجلاس میں وزیر مملکت برائے داخلہ طلال چوہدری، سیکرٹری داخلہ خرم آغا، چیئرمین سی ڈی اے محمد علی رندھاوا، آئی جی اسلام آباد پولیس اور دیگر اعلیٰ حکام نے شرکت کی۔
