لاہور: وزیر اعلیٰ پنجاب مریم نواز نے صوبے میں جرائم پر قابو پانے کے لیے کرائم کنٹرول ڈیپارٹمنٹ (سی سی ڈی) قائم کرنے کی منظوری دے دی۔
سی سی ڈی جدید ٹیکنالوجی، بشمول ڈرون سرویلنس، کے ذریعے منظم جرائم کی روک تھام کرے گا۔ کسی بھی جرم کے سرزد ہونے پر سرویلنس ڈرون پانچ منٹ میں جائے وقوعہ پر پہنچ جائے گا، جبکہ قتل اور دیگر جرائم پر فوری کارروائی کی جائے گی۔
ڈیپارٹمنٹ شوٹر مافیا اور قبضہ مافیا کے خلاف سخت اقدامات کرے گا اور پنجاب بھر میں جرائم اور مجرموں سے متعلق ڈیٹا مینجمنٹ کا ذمہ دار ہو گا۔
کرائم کنٹرول ڈیپارٹمنٹ کے سربراہ ایڈیشنل انسپکٹر جنرل ہوں گے، جبکہ اس میں 3 ڈی آئی جی، ڈویژنل ہیڈ کوارٹرز میں ایس ایس پی اور ایس پی، اور ہر ضلع میں ڈی ایس پی تعینات کیے جائیں گے۔ مجموعی طور پر 4,258 افسران اور اہلکار سی سی ڈی کا حصہ ہوں گے، جن میں سے 2,258 کو پنجاب پولیس سے فوری طور پر تبادلہ کر دیا گیا ہے۔
وزیر اعلیٰ مریم نواز نے سی سی ڈی کے لیے عمارتیں، گاڑیاں اور جدید آلات فراہم کرنے کی منظوری دے دی ہے، جبکہ اس کے لیے فوری قانون سازی کا بھی حکم دیا ہے۔
انہوں نے کہا کہ کرائم کنٹرول ڈیپارٹمنٹ کے قیام سے جرائم میں واضح کمی آئے گی اور عوام کے تحفظ کو یقینی بنانے کے لیے ہر ممکن وسائل فراہم کیے جائیں گے۔
