نوشہرہ: جامعہ دارالعلوم حقانیہ اکوڑہ خٹک میں نماز جمعہ کے بعد خودکش دھماکے میں شہید ہونے والے مولانا حامد الحق اور دیگر افراد کی نماز جنازہ ادا کر دی گئی۔
رپورٹس کے مطابق، جمعیت علمائے اسلام (س) کے سربراہ مولانا حامد الحق کی نماز جنازہ ان کے صاحبزادے مولانا عبد الحق ثانی نے پڑھائی۔ نماز جنازہ میں افغان قونصلر اور شہریوں کی بڑی تعداد نے شرکت کی۔
نماز جنازہ کے موقع پر دارالعلوم حقانیہ اکوڑہ خٹک میں سکیورٹی کے سخت انتظامات کیے گئے تھے۔ مدرسہ کے اطراف میں پولیس کی بھاری نفری تعینات کی گئی تھی، اور دارالعلوم کے داخلی دروازوں پر سکینرز نصب کیے گئے تھے۔ اس کے علاوہ اکوڑہ خٹک کی مرکزی شاہراہ کو ٹریفک کے لیے بند کر دیا گیا تھا۔
اس موقع پر انسپکٹر جنرل آف پولیس (آئی جی) ذوالفقار حمید نے نوشہرہ کا دورہ کیا اور دھماکے میں شہید ہونے والے نائب مہتمم مولانا حامد الحق کے جنازے کے سکیورٹی انتظامات کا جائزہ لیا۔ انہوں نے اس موقع پر ضروری ہدایات جاری کیں۔
آئی جی خیبرپختونخوا ذوالفقار حمید نے کہا کہ مدرسہ حقانیہ جیسے مقدس مقام پر حملہ دشمن عناصر کا بزدلانہ اقدام ہے اور مولانا حامد الحق و دیگر کی شہادت ملک اور قوم کے لیے ایک بڑا سانحہ ہے۔
