دبئی : انٹرنیشنل کرکٹ کونسل (آئی سی سی) نے مارچ 2025 کے مینز پلیئر آف دی منتھ ایوارڈ کی نامزدگیوں کا اعلان کر دیا ہے، جس میں بھارت کے شریاس ائیر اور نیوزی لینڈ کے راچن رویندرا اور جیکب ڈفی شامل ہیں۔
آئی سی سی کی جانب سے جاری کردہ بیان کے مطابق، شریاس ائیر نے آئی سی سی چیمپئنز ٹرافی 2025 میں بھارت کی جیت میں اہم کردار ادا کیا۔ ان کی شاندار بیٹنگ اور فیلڈنگ نے بھارت کو ٹورنامنٹ میں کامیاب بنانے میں مدد دی۔
نیوزی لینڈ کے راچن رویندرا نے بھی چیمپئنز ٹرافی 2025 میں آل راؤنڈ کارکردگی کا مظاہرہ کیا۔ ان کی عمدہ بیٹنگ اور بولنگ نے نیوزی لینڈ کے لئے میچز جیتنے میں اہم کردار ادا کیا۔
دوسری طرف، نیوزی لینڈ کے فاسٹ بولر جیکب ڈفی کو پاکستان کے خلاف حالیہ ہوم وائٹ بال سیریز میں شاندار کارکردگی کے باعث اس ایوارڈ کے لیے نامزد کیا گیا۔ ان کی بولنگ نے پاکستان کی بیٹنگ لائن کو مشکل میں ڈال دیا تھا اور ان کی پرفارمنس کو بہت سراہا گیا۔
یہ تین کھلاڑی اس ایوارڈ کے لیے ایک دوسرے کے مد مقابل ہیں اور مارچ 2025 کے پلیئر آف دی منتھ کا اعزاز حاصل کرنے کے لئے اپنی بہترین کارکردگی کا مظاہرہ کر چکے ہیں۔ یاد رہے کہ آئی سی سی کی جانب سے یہ ایوارڈ ہر ماہ دنیا بھر کے بہترین کرکٹرز کو دیے جاتے ہیں، جن کی کارکردگی نے عالمی کرکٹ میں اہم اثرات مرتب کیے ہوں۔
